ہفتہ وار بنیادوں پر مہنگائی کی شرح میں ایک 1.34 فیصد کی کمی ریکارڈ کی گئی ہے ، مہنگائی بڑھنے کی سالانہ شرح 4.17 فیصد پر آگئی، ایک ہفتے کے دوران 18 اشیا مہنگی ہوئیں جبکہ 14 کی قیمتوں میں کمی ریکارڈ کی گئی۔
ادارہ شماریات کے مطابق گزشتہ ہفتے کے دوران ہائی اسپیڈ ڈیزل 2.79روپے فی لیٹر مہنگا ہوا، فی کلو گرام ایل پی جی کی قیمت 1.42 روپے اور ایک درجن انڈوں کی قیمت 2.89 روپے بڑھی۔ چاول، بیف، دال مونگ اور آلو بھی مہنگی ہونے والی اشیا میں شامل ہیں۔ دوسری طرف گزشتہ ہفتے کے دوران فی کلو ٹماٹر 52.36 روپے سستے اور چکن 58.27 روپے سستا ہوا۔ گندم کے آٹے کا 20 کلو تھیلا 53.82 روپے سستا ہوا۔ ایک ہفتے کے دوران بجلی کی فی یونٹ قیمت میں بھی 32 پیسے کمی ریکارڈ کی گئی ۔ کیلے ،لہسن،پیاز،چنے اور دال ماش بھی سستی ہونے والی اشیا میں شامل ہیں ۔ تازہ دودھ اور دہی سمیت 19 اشیا کی قیمتیں مستحکم رہیں۔
