بلوچستان کے دارالحکومت کوئٹہ میں سریاب روڈ پر شاہوانی اسٹیڈیم کے قریب دھماکے میں 4 افراد جاں بحق جبکہ متعدد زخمی ہوگئے۔
پولیس کے مطابق دھماکے کی نوعیت کا تعین کیا جا رہا ہے اور دھماکے کے فوری بعد پولیس اور ریسکیو ٹیمیں جائے وقوعہ پر پہنچ گئی ہیں جبکہ زخمیوں کو سول اسپتال اور بی ایم سی اسپتال منتقل کر دیا گیا۔
اسپتال ذرائع کے مطابق بعض زخمیوں کی حالت تشویشناک ہے۔
دوسری جانب حکومت بلوچستان نے دھماکے کی تحقیقات کا حکم دے دیا ہے۔
محکمہ داخلہ بلوچستان کے مطابق امدادی ٹیمیں جائے وقوعہ پر سرگرم ہیں جبکہ سیکورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں۔
ترجمان محکمہ داخلہ نے کہا کہ واقعے کی اعلیٰ سطح پر تحقیقات کا آغاز کر دیا گیا ہے۔
عوام سے اپیل کی گئی ہے کہ افواہوں پر کان نہ دھریں اور اداروں کے ساتھ مکمل تعاون کریں۔
