بھارت کی بھوجپوری اداکارہ انجلی راگھو نے ساتھی اداکار کی جانب سے نامناسب انداز میں چھونے پر فلم انڈسٹری چھوڑنے کا اعلان کردیا۔
بھارتی میڈیا کے مطابق بھوجپوری فلم انڈسٹری کی معروف اداکار و گلوکار پَون سنگھ نے ساتھی اداکارہ انجلی راگھو کے ساتھ ایک پروموشنل تقریب کے دوران نامناسب رویہ اختیار کیا جس کی ویڈیو سوشل میڈیا پر وائرل ہورہی ہے۔
ویڈیو میں واضح نظر آرہا ہے کہ گانے "سَیّاں سیوا کرے" کی تقریب کے دوران پَون سنگھ نے انجلی کی کمر پر ان کی اجازت کے بغیر نامناسب انداز میں ہاتھ رکھا اور اداکارہ سے نامناسب مذاق بھی کیا۔
واقعے کے بعد سوشل میڈیا پر صارفین نے پَون سنگھ کو شدید تنقید کا نشانہ بنایا اور انہیں بے شرم اور بدتمیزی قرار دیا۔ صارفین کا کہنا تھا کہ انجلی اس حرکت پر واضح طور پر اَن کمفرٹیبل اور بے چین نظر آرہی تھیں۔
سوشل میڈیا پر بعض صارفین نے پَون سنگھ کو بھوجپوری انڈسٹری کی بدنامی کا سبب قرار دیا۔
بھارتی میڈیا کی رپورٹ کے مطابق ویڈیو وائرل ہونے کے بعد انجلی راگھو نے ایک لائیو سیشن کے دوران واقعے پر افسوس کا اظہار کرتے ہوئے کہا کہ وہ بے حد دلبرداشتہ ہیں اور آئندہ بھوجپوری انڈسٹری میں کام نہ کرنے کا فیصلہ کرچکی ہیں۔
اداکارہ کا مزید کہنا تھا کہ اسٹیج پر موجود ماحول کے باعث وہ فوری ردعمل نہ دے سکیں تاہم وہ اس رویے کو ناقابلِ برداشت سمجھتی ہیں۔
دوسری جانب صارفین کی کڑی تنقید کے بعد پون سنگھ نے اداکارہ اور شائقین سے معافی مانگ لی، جس کے بعد اداکارہ نے انڈسٹری چھوڑنے کا اعلان واپس لے لیا۔
