سیالکوٹ ایئرپورٹ سے شدید بارشوں اور سیلابی صورتحال کے باعث معطل کیا گیا فضائی آپریشن بحال کرنے کا اعلان کردیا گیا۔ ترجمان کا کہنا ہے کہ آج شام 6 بجے سے فضائی آپریشن بحال ہوجائے گا۔
سیالکوٹ ایئرپورٹ کے ترجمان محمد عمیر کا کہنا ہے کہ فضائی آپریشن معطلی کا نوٹم منسوخ کردیا گیا، سیالکوٹ ایئرپورٹ سے آج شام 6 بجے سے تمام تر فضائی آپریشن بحال کردیا جائے گا۔
انہوں نے کہا کہ تمام فلائٹ آپریشن کو سیلابی پانی کے باعث عارضی طور پر معطل کیا گیا تھا، ایئرپورٹ سے سیلابی پانی کا اخراج تاحال بھی جاری ہے، رن وے، ٹیکسی وے، ایپرون سمیت ٹرمنل بلڈنگ اور مرکزی احاطہ سیلابی پانی سے مکمل محفوظ ہیں۔
سیالکوٹ ایئرپورٹ انتظامیہ نے پاک فوج اور ضلعی انتظامیہ کی معاونت پر شکریہ ادا کیا۔ ترجمان کا کہنا ہے کہ موجودہ صورتحال پر انتظامیہ کڑی نظر رکھے ہوئے ہے، ایئرپورٹ پر نصب تمام تر آلات مکمل محفوظ ہیں۔
واضح رہے کہ سیالکوٹ ایئرپورٹ پر فضائی آپریشن شدید بارشوں اور سیلابی صورتحال کے باعث 28 اگست کو معطل کیا گیا تھا۔
