او جی ڈی سی ایل نے جھل مگسی میں بڑا گیس ترقیاتی منصوبہ مکمل کر لیا۔ منصوبے سے گیس اور کنڈنسیٹ کی پیداوار شروع ہوگئی۔
ترجمان او جی ڈی سی ایل کے مطابق منصوبے سے 14 ملین معکب فٹ یومیہ گیس اور 45 بیرل کنڈنسیٹ حاصل کی جا رہی ہے۔ گیس کو سوئی سدرن کی مین پائپ لائن کے نیٹ ورک میں شامل کردیا گیا ہے۔
یہ منصوبہ فروری 2024 میں گورنمنٹ کے مراعاتی پیکج کی منظوری کے بعد شروع کیا گیا تھا۔ او جی ڈی سی ایل 56 فیصد اور پی او ایل 24 فیصد اور جی ایچ پی ایل 20 فیصد شراکت دار ہیں۔
ترجمان نے بتایا کہ سی ایس آر فنڈ سے ضلع جھل مگسی میں اسکول، ہیلتھ کیئر سہولت مراکز اور کم آمدنی والے بے گھر افراد کے لیے 84 ماڈل مکانات تعمیر کیے گئے ہیں۔ مقامی نوجوانوں کو اسکالرشپس اور فنی تربیت کے مواقع فراہم کیے گئے۔ اس کے علاوہ ایمبولینسز کی فراہمی، فری آئی کیمپس اور 800 خاندانوں کو راشن بیگز بھی تقسیم کیے گئے۔ صاف پانی کی فراہمی کے لیے دو آر او پلانٹس اور متعدد واٹر ٹینکس بھی نصب کیے گئے ہیں۔
ترجمان او جی ڈی سی ایل کا کہنا ہے کہ ضلع جھل مگسی میں سی ایس آر کے دیگر منصوبے بھی جاری ہیں۔
