پاکستان کے 78ویں یوم آزادی پر مختلف ممالک کے سفارتخانوں اور سفراء کی جانب سے مبارکباد اور نیک خواہشات کے پیغامات دیے گئے۔
ایرانی سفارتخانہ
اسلام آباد میں ایرانی سفارتخانے نے اپنے پیغام میں کہا کہ یہ اس عظیم قوم کی اعلیٰ اقدار کو خراجِ تحسین پیش کرنے کا دن ہے، فخر ہے کہ ہم پاکستان کی ناقابلِ تسخیر استقامت، اتحاد اور شاندار کامیابیوں کا جشن منا رہے ہیں۔
پیغام میں کہا گیا کہ پاکستان کی قابلِ احترام حکومت اور معزز، برادر، دوست اور ہمسایہ قوم کو مبارکباد پیش کرتے ہیں۔
ایران اور پاکستان کی دوستی، باہمی احترام اور تعاون کے مضبوط رشتے بےحد عزیز ہیں اور پاکستان کی خوشحالی، سلامتی، ترقی اور استحکام کے لیے ہمیشہ دعا گو ہیں۔
دونوں برادر اقوام کے درمیان پائیدار دوستی مزید گہری اور مضبوط ہو، یہی خواہش ہے۔
روسی سفارتخانہ
روسی سفارتخانے کی جانب سے جاری خصوصی تہنیتی پیغام میں کہا گیا کہ پاکستان نے آزادی کے بعد بہت سے شعبوں میں نمایاں ترقی کی اور بین الاقوامی برادری میں اپنی پوزیشن مضبوط کی اور خلائی تحقیق میں بھی پاکستان نے اپنا حصہ ڈالا۔
چیلنجز کے باوجود پاکستان قائداعظم اور اقبال کے اصولوں اور اپنی قومی اقدار و روایات پر کاربند ہے۔
پاکستانی عوام بجا طور پر اپنے ملک پر فخر کر سکتے ہیں اور روس اپنے پاکستانی دوستوں کی کامیابی، خوشحالی اور فلاح کا خواہاں ہے۔
جاپانی سفیر
پاکستان میں جاپانی سفیر اکاماتسو شوچی نے ویڈیو پیغام میں پاکستانی عوام کو یومِ آزادی کی مبارکباد دیتے ہوئے کہا کہ جاپان ایک مضبوط اور خوشحال پاکستان کے لیے شانہ بشانہ ہے۔
اسلام آباد میں جاپانی سفارتخانے کے پاکستانی اور جاپانی عملے نے مل کر قومی نغمہ "جیوے جیوے پاکستان" بھی گایا۔
آئرش سفیر
پاکستان میں آئرلینڈ کی سفیر میری او نیل نے علامہ اقبال کے اشعار پڑھ کر پاکستانی قوم کو یوم آزادی کی مبارکباد پیش کی اور کہا کہ بیرونِ ملک اور پاکستان میں موجود تمام دوستوں کو یومِ آزادی مبارک ہو۔
ازبک سفیر
پاکستان میں ازبکستان کے سفیر ایلشر تختیف نے پاکستانی قوم کو گرمجوشی سے مبارکباد پیش کی اور 14 اگست کو "فخر اور خوشی کا دن" قرار دیتے ہوئے کہا کہ یہ دن خوابوں، قربانیوں اور اٹل یقین کی علامت ہے۔
اپنے پیغام میں سفیر نے کہا کہ وہ نہ صرف ازبکستان کے نمائندے کے طور پر بلکہ "ایک دوست اور بھائی" کی حیثیت سے بات کر رہے ہیں۔
انہوں نے کہا کہ پاکستان میں آزادی کا جذبہ ازبکستان کی تاریخ سے مماثلت رکھتا ہے۔
انہوں نے پاکستان کے قدرتی حسن کی تعریف کرتے ہوئے کہا کہ شمالی علاقوں کے برفیلے پہاڑوں سے لے کر بحیرہ عرب کی لہروں تک، پاکستان قدرتی وسائل سے مالا مال ہے۔
سفیر نے پاکستان اور ازبکستان کے درمیان گہرے تعلقات پر روشنی ڈالتے ہوئے کہا کہ دونوں ممالک کے تعلقات صرف سفارتی نہیں بلکہ "دلوں کا رشتہ" ہیں جو تجارت، ثقافت، تعلیم اور ٹرانسپورٹ کے شعبوں میں تعاون سے مزید مضبوط ہوئے ہیں۔
اس موقع پر انہوں نے پاکستان کی طاقت، اتحاد اور روشن مستقبل کے لیے دعا کی۔
انہوں نے کہا پاکستان کا پرچم ہمیشہ بلند رہے، اس کے عوام خوشحال ہوں، اور ہر گھر امن، محبت اور امید سے بھر جائے۔
