وزارت خارجہ نے مختلف ممالک میں قید پاکستانیوں کی تفصیل پارلیمان میں پیش کردی، قومی اسمبلی کو بتایا گیا کہ ملزمان کی حوالگی معاہدے کے باوجود سب سے زیادہ 10 ہزار 279 پاکستانی قیدی سعودی عرب میں ہیں ۔
تفصیلات کے مطابق پارلیمنٹ میں بتایا گیا کہ مشرق وسطیٰ اور جنوب مشرقی ایشیاء کے ممالک میں 15 ہزار 953 پاکستانی قید ہیں ، 3 ممالک کےساتھ ملزمان کی حوالگی معاہدے کے باوجود وہاں پاکستانی قیدیوں کی تعداد 13 ہزار 852 ہے، متحدہ عرب امارات میں 3523 اور کویت میں 50 پاکستانی قیدی ہیں۔
وزارت خارجہ کے دستاویز کے مطابق 2100 قیدی ان 14 ممالک میں قید ہیں جن کے ساتھ ملزمان کی حوالگی کا معاہدہ نہیں ، عراق میں 81، اردن میں 8، مصرمیں 12،بحرین میں 581،عمان میں 252،قطر میں 599 ، آسٹریلیا میں 27، جنوبی کوریا 7،جاپان 16،ملائیشیا 459، تھائی لینڈ 35،کمبوڈیا میں 22 ، فلپائن اور ویتنام میں ایک، ایک پاکستانی قید ہے۔
وزیر خارجہ کے مطابق پاکستان اورسعودی عرب نے قیدیوں کی وطن واپسی کے ایک معاہدےپر دستخط کیےہیں، اس معاہدے کے تحت 16 مجرم اپنی باقی سزا پاکستان میں کاٹ سکیں گے ، پاکستانی سفارتخانہ قیدیوں کی وطن واپسی کیلئےسعودی عدالتی اداروں کے ساتھ قریبی رابطےمیں ہے، اب تک اس معاہدہ کے تحت 27 پاکستانی قیدیوں کو سعودی عرب سے واپس بھیجا جا چکا ۔
وزیر خارجہ کا کہناتھا کہ مختلف سعودی جیلوں میں بند 735 قیدیوں کے انٹرویو کے بعد انکے کیسز معاہدے کے تحت پراسس کیے جا رہے ہیں، مئی 2025 تک سعودی جیلوں میں قید چار ہزار سے زائد پاکستانی قیدیوں کی معاونت کی گئی ہے ، جون 2025 میں پاکستانی مشن نے یو اے ای سے77 پاکستانی قیدیوں کی واپسی کی درخواست کی ، متحدہ عرب امارات کی فراہم فہرست کے تحت 30 پاکستانی قیدیوں کو پاکستان منتقل کیا جائے گا۔
