جنوبی امریکی ملک ایکواڈور کے نائٹ کلب میں فائرنگ سے 8 افراد ہلاک ہوگئے۔
غیر ملکی میڈیا کے مطابق جنوبی امریکا کے ملک ایکواڈور کے ایک نائٹ کلب میں فائرنگ کا واقعہ سب سے خطرناک سمجھے جانے والے ساحلی صوبے گوایاس کے دیہی علاقے سانتا لوسیا میں پیش آیا۔
حکام کا کہنا ہے کہ بھاری ہتھیاروں سے لیس مشتبہ افراد موٹر سائیکلوں اور 2 گاڑیوں میں آئے اور کلب میں اندھا دھند فائرنگ کردی، جس کے نتیجے میں 7 افراد موقع پر ہی ہلاک ہوگئے جبکہ ایک شخص اسپتال میں دم توڑ گیا، فائرنگ سے ہلاک افراد کی عمریں 20 سے 40 سال کے درمیان تھیں۔
حکام کے مطابق فائرنگ کے واقعے میں 3 افراد زخمی بھی ہوئے جنہیں فوری طبی امداد کیلئے اسپتال منتقل کردیا گیا، جہاں ان کی حالت خطرے سے باہر بتائی جاتی ہے۔
غیر ملکی میڈیا رپورٹس کے مطابق فائرنگ کی اصل وجہ تاحال سامنے نہیں آسکی۔ حکام کا کہنا ہے کہ معاملے کی تمام پہلوؤں سے تحقیقات کی جا رہی ہیں۔
