ملک بھر میں 2 سال کے دوران 5 ارب 78 کروڑ روپے سے زائد کی بجلی چوری کا انکشاف ہوا ہے۔ آڈٹ رپورٹ کے مطابق پشاور، حیدرآباد اور لاہور ریجن بجلی چوری میں سب سے آگے رہے، اسلام آباد میں بھی 7 کروڑ 46 لاکھ روپے کی بجلی چوری ہوئی، بجلی کی تقسیم کار کمپنیاں محکمانہ اور قانونی کارروائی میں ناکام رہیں۔
آڈٹ رپورٹ میں انکشاف ہوا ہے کہ ملک بھر میں دو سال کے دوران 5 ارب 78 کروڑ روپے سے زائد کی بجلی چوری کی گئی، 2 لاکھ 62 ہزار 740 صارفین بجلی چوری میں ملوث نکلے۔
رپورٹ کے مطابق بجلی چوری میں پشاور، حیدرآباد اور لاہور ریجن سب سے آگے رہے جبکہ اسلام آباد بھی بجلی چوری کرنیوالے سرفہرست شہروں میں شامل ہے۔
آڈٹ رپورٹ میں بتایا گیا ہے کہ بجلی چوری ڈائریکٹ کنکشن، کنڈے، میٹر ٹیمپرنگ اور جعلی میٹرز کے ذریعے کی گئی، بجلی چوری سال 2022-23ء اور 2023-24ء کے دوران 9 ریجنز میں ہوئی۔
رپورٹ میں انکشاف ہوا ہے کہ پشاور الیکٹرک کمپنی میں ایک ارب 84 کروڑ روپے کی بجلی چوری کی گئی، حیدرآباد الیکٹرک سپلائی کمپنی میں ایک ارب 61 کروڑ کی بجلی چوری ہوئی جبکہ لاہور الیکٹرک کمپنی میں 2 سال میں ایک ارب 35 کروڑ کی بجلی چوری کی گئی۔
آڈٹ رپورٹ میں بتایا گیا ہے کہ بجلی کی تقسیم کار کمپنیاں محکمانہ اور قانونی کارروائی میں ناکام رہیں، کمپنیوں نے چوری میں ملوث افراد سے واجبات کی وصولی کی یقین دہانی کرادی۔
رپورٹ کے مطابق بجلی چوری کرنیوالے دیگر شہروں میں فیصل آباد میں 56 کروڑ، ملتان میں 16 کروڑ 20 لاکھ کی بجلی چوری ہوئی، کوئٹہ ریجن میں 12 کروڑ 86 لاکھ روپے اور وفاقی دارالحکومت اسلام آباد میں 7 کروڑ 46 لاکھ روپے کی بجلی چوری کا انکشاف ہوا ہے۔
رپورٹ میں بتایا گیا ہے کہ سکھر ریجن میں ایک کروڑ 57 لاکھ جبکہ خیبرپختونخوا کے سابق قبائلی علاقوں میں ایک کروڑ 32 لاکھ کی بجلی چوری کی گئی۔
