وزیراعظم شہبازشریف کی زیر صدارت چینی باشندوں کی سیکیورٹی انتظامات سے متعلق اہم اجلاس ہوا جس دوران خصوصی سیکیورٹی انتظامات کی پیشرفت پر بریفنگ دی گئی جبکہ وزیر داخلہ نے شہبازشریف کو پورے ملک میں سیکیورتی انتظامات سے متعلق آگاہ کیا۔
وزیراعظم کو بریفنگ میں بتایا گیا کہ دہشتگردی کے خدشات کے پیش نظر چینی باشندوں کی خصوصی سیکیورٹی انتظامات نافذ العمل ہیں، وفاق اور تمام صوبے اس ضمن میں بھرپور تعاون کے ساتھ کام کررہے ہیں، چینی باشندوں کو سفر کیلئے سیکیورٹی ایسکورٹ کی سہولت دی جا رہی ہے، تمام نئے رہائشی منصوبوں میں سیف سٹی کے معیار کے کیمرے نصب کئے جائیں گے۔
شہبازشریف نے کہا کہ ملک میں چینی باشندوں کی سیکیورٹی موثر بنانے کیلئے متعدد اقدامات کئے جا رہے ہیں، سیف سٹی منصوبے اس بڑھتی ہوئی استعداد کی بہترین مثال ہیں، پورے ملک میں عالمی معیار کے مطابق سیف سٹی منصوبے تعمیر کئے جا رہے ہیں، چین کے ساتھ بھائی چارے پر مبنی ہمارے تاریخی تعلقات ہیں، چینی بھائیوں کا تحفظ حکومت پاکستان کی اولین ترجیح ہے، سی پیک پاکستان اور چین کا انتہائی اہم مشترکہ منصوبہ ہے۔
وزیراعظم شہبازشریف نے کہا کہ سی پیک اب اپنے دوسرے مرحلے میں داخل ہو رہا ہے، دونوں ممالک کے درمیان بزنس ٹو بزنس طرز پر معاملات طے کئے جائیں گے، معیشت میں چینی کمپنیوں کا اعتماد ہمارے معاشی مستقبل کیلئے انتہائی اہم ہے، ہوائی اڈوں پر چینی باشندوں کی سہولت کیلئے ترجیحی بنیادوں پر اقدامات کئے جائیں۔
