وفاقی وزیر داخلہ محسن نقوی نے تہران میں ایران کے صدر مسعود پزشکیان سے ملاقات کی جس میں باہمی دلچسپی کے امور، پاک ایران تعلقات اور دوطرفہ تعاون پر تبادلہ خیال کیا گیا۔
وزیرداخلہ محسن نقوی نے ایرانی صدر مسعود پزشکیان کو جنگ میں فتح کی مبارکباد دی، کہا پاکستان نے ایران پر حملے کی ہر فورم پر پر زور مذمت کی، ایران کے سپریم لیڈر سمیت پوری قوم نے جارحیت کے خلاف ڈٹ کر مقابلہ کیا، آیت اللہ خامنہ ای کی دانشمندانہ قیادت اور آپکی بہترین حکمت عملی نے جنگ میں فیصلہ کن کردارادا کیا۔
محسن نقوی نے پاکستان کی پارلیمنٹ نے ایران پر جنگ مسلط کرنے کیخلاف مذمتی قرارداد منظور کی، پاکستان کی پارلیمنٹ نے ایران کے اپنے دفاع کے جائز حق کی حمایت کی۔ وزیرداخلہ نے وزیراعظم کا ایرانی صدر کو نیک خواہشات اور احترام کا پیغام پہنچایا۔
ایرانی صدر مسعود پزشکیان نے کہا کہ پاکستان کے ساتھ اپنے تعلقات کو انتہائی اہمیت دیتے ہیں، پاکستان نے جنگ کے دوران جس طرح ساتھ دیا وہ کبھی نہیں بھول سکتے، اسلامی ممالک کے درمیان اتحاد اور ہم آہنگی ناگزیر ہے، صہیونی حکومت مسلم ممالک کےدرمیان تقسیم اورکمزوری پیدا کرنےکی کوشش کر رہی ہے۔
ایرانی صدر کا کہنا تھا کہ مسلم حکومتیں اسلامی اتحاد کی اہمیت سمجھ جائیں توصہیونی حکومت کیخلاف ایک متحد محاذ بنا سکتی ہیں۔
مسعود پزشکیان نے ایران اور پاکستان کے درمیان موجودہ دو طرفہ تعلقات پر اطمینان کا اظہار کیا اور دونوں ممالک میں جامع تعاون وسیع کرنے کیلئے سفارتی تبادلوں اور تعمیری مکالمے کی اہمیت پرزور دیا۔ کہا دونوں ممالک کے پاس تعاون کو فروغ دینے کےبے پناہ مواقع موجود ہیں، ایرانی صدر نے اسرائیلی مسلط کردہ جنگ کے دوران پاکستان کی مخلصانہ حمایت پر شکریہ ادا کیا۔
