امریکی صدر ڈونلڈ ٹرمپ کی جانب سے ایران، اسرائیل جنگ بندی کے اعلان کے بعد عالمی منڈی میں خام تیل کی قیمتوں میں کمی کا سلسلہ جاری ہے۔
امریکی خام تیل 7.2 فیصد کم ہو کر 68.51 ڈالر فی بیرل پر آگیا جبکہ برطانوی خام تیل کی قیمت میں7.2فیصد کمی دیکھی گئی۔ مارکیٹ میں فروخت 71.48 ڈالرفی بیرل پر بند ہوئی۔
خبر ایجسنی کے مطابق تیل کی قیمتیں اب 12 جون کی نسبت کم ہیں جب اسرائیل نے ایران پر پہلا حملہ کیا تھا۔
واضح رہے کہ مشرق وسطیٰ کشیدگی کے تناظر میں پاکستان میں بھی پٹرولیم مصنوعات کی قیمتوں میں بھاری اضافے کا امکان ظاہر کیا جارہا تھا تاہم اب عالمی منڈی میں تیل کی قیمتیں 12 جون سے بھی کم ترین سطح پر آگئیں۔
یاد رہے کہ امریکی صدر ڈونلڈ ٹرمپ نے اپنے پیغام میں لکھا کہ جنگ بندی اب نافذ العمل ہے۔ پلیز اس کی خلاف ورزی نہ کریں۔
پٹرولیم مصنوعات کے ذخائر کافی ہیں، وفاقی وزیر پیٹرولیم
اس سے قبل وفاقی وزیر پیٹرولیم علی پرویز ملک نے کہا تھا کہ وزیراعظم شہباز شریف نے ایران ، اسرائیل جنگ کے تناظر میں پیٹرولیم مصنوعات کے ذخائر کے جائزے کے لیے ایک کمیٹی تشکیل دی ہے جبکہ وزیر خزانہ کی سربراہی میں قائم اس کمیٹی میں وہ خود، چیئرمین اوگرا، سیکریٹری پیٹرولیم اور دیگر اعلیٰ افسران شامل ہیں۔
وزیر مملکت علی پرویز نے بتایا کہ کمیٹی روزانہ کی بنیاد پر پیٹرولیم ذخائر کا جائزہ لیتی ہے اور ضروری ہدایات جاری کرتی ہے۔ انہوں نے کہا کہ آج بھی ایک جائزہ اجلاس ہوا جس میں طے کیا گیا کہ ملک میں پیٹرولیم مصنوعات کے ذخائر کافی ہیں۔
