قومی اسمبلی اجلاس کے دوران اس وقت گرما گرمی ہوگئی جب چیئرمین پیپلزپارٹی بلاول بھٹو زرداری کی تقریر کے دوران پاکستان تحریک انصاف کے اراکین نے احتجاج کیا۔
پی ٹی آئی کے رکن قومی اسمبلی اقبال آفریدی نے بلاول بھٹو پر سخت تنقید کی جس پر پیپلزپارٹی کے اراکین شدید غصے میں آگئے اور اسپیکر کے ڈائس تک پہنچ گئے۔
نمائندہ خصوصی سماء سے گفتگو میں حنیف عباسی کا کہنا ہے وزیرخزانہ کو مائیک دینے پر پی ٹی آئی کے دو سے تین لوگوں نے حملہ کیا اور مارنے کیلئے دوڑے تو انہوں نے حملے کو روکا اور ہاتھا پائی ہوگئی۔
حنیف عباسی نے کہا کہ ذاتی طور پر ہاتھا پائی کے حق میں نہیں مگر جب آپ کے گریبان تک ہاتھ پہنچ جائیں تو حق بنتا ہے، اسپیکر نے عمرایوب کو مائیک دیا تو پیپلز پارٹی نے احتجاج کیا۔
انہوں نے کہا کہ وزیرخزانہ کو مائیک دینے پر 2 سے 3 لوگ اٹھ کر آگئے، انہوں نے وزیرخزانہ پر حملہ کیا، مارنے کیلئے دوڑے، میں نے اپوزیش کے حملے کو روکا تو میرے ساتھ اور ساتھی شامل ہوگئے، ایسے واقعات نہیں ہونے چاہئیں، مگرپی ٹی آئی کی سیاست اسی بنیادپر ہوتی ہے، بلاول بھٹو کے بعد وزیرخزانہ نے بات کرنی تھی، یہ طے شدہ تھا۔
واضح رہے کہ بلاول بھٹو کی تقریر کے دوران اپوزیشن کا احتجاج اور نعرے بازی کی۔ اسپیکر نے قائد حزب اختلاف عمر ایوب کو بولنے کی اجازت دی تو جیالے اور ن لیگ والے بھی برہم ہوگئے۔ احتجاج کا جواب احتجاج سے دیا۔ بلاول بھٹو نے پی ٹی آئی کے احتجاج کو بھارتی فنڈنگ سے جوڑ دیا۔
