عطاء آباد جھیل میں ہوٹل کی جانب سے سیوریج پانی کے معاملے پر ڈی سی ہنزہ دفتر کی فائنڈنگ رپورٹ سامنے آ گئی ہے ۔
فائنڈنگ رپورٹ کے مطابق غیر ملکی شہری کی شیئر کردہ ویڈیو 29 سے 31 مئی کی تھی، عطا آباد جھیل میں سیوریج پانی کی موجودگی نہیں پائی گئی، براؤن پانی ممکنہ طور پر قریبی نالے یا پہاڑوں کا پانی ہوسکتا ہے۔
ڈائریکٹر ای پی اے کے رپورٹ میں موقف دیا کہ گندا پانی عام طور پر پانی کی سطح پر نہیں تیرتا۔ رپورٹ میں کہا گیاہے کہ ضلعی انتظامیہ سمیت مشترکہ ٹیم نے متعلقہ ریزورٹ کا تفصیلی معائنہ کیا، ریزورٹ کا اندرونی سیوریج سسٹم منظور شدہ سیوریج پلان سے ہٹ کر تھا، زیادہ مین ہول کی بجائے صرف ایک مین ہول تعمیر کیا گیا تھا، اندرونی سیوریج میں پروٹوکول کی خلاف ورزی پائی گئی ۔
رپورٹ کے مطابق وائرل ویڈیو میں براہ راست ثبوت کی عدم موجودگی پائی گئی، ای پی اے ضوابط اور این او سی کی خلاف ورزی پائی گئی، نجی ریزورٹ کے توسیع شدہ حصے کو سیل کیا گیا اور 15 لاکھ روپے جرمانہ بھی عائد کیا گیا، اصلاحی کام مکمل ہونے تک مجوزہ حصہ سیل رکھا جائے گا۔
