امریکی صدر ڈونلڈ ٹرمپ نے کہا ہے کہ سٹیو وٹکوف اور کُشنر کا اسلام آباد کا دورہ منسوخ کر دیاہے، وزیراعظم پاکستان بہت شاندار اور فیلڈ مارشل لاجواب ہیں ۔
امریکی صدر ڈونلڈ ٹرمپ کا کہناتھا کہ فیلڈ مارشل اور وزیراعظم بہترین شخصیت ہیں،ہم نے اسٹیووٹکوف اور کُشنر کا دورہ منسوخ کر دیا ہے،ہم 15 سے 16 گھنٹے کا سفر نہیں کریں گے، اسٹیو وٹکوف اور کُشنر کا دورہ طویل سفر کی وجہ سے منسوخ کیا،محض بیٹھنے اور بے مقصد گفتگو کیلئے جانے کی ضرورت نہیں ہے ۔
امریکی صدر نے اس سے قبل بیان جاری کرتے ہوئے کہا تھا کہ کسی کو نہیں معلوم ایران میں اصل فیصلہ کون کرتا ہے، شاید وہ خود بھی نہیں جانتے، ایران کے پاس کچھ نہیں ،کنٹرول ہمارے پاس ہے،ایران کی قیادت میں شدید اختلاف اور الجھن کا شکارہے،میں نے مذاکراتی ٹیم کا دورہ اسلام آباد منسوخ کردیا ہے۔
ٹرمپ کا اپنے ایک اور بیان میں کہناتھا کہ ایرانی مذاکراتی ٹیم جب چاہیں ہمیں براہ راست کال کرسکتے ہیں،ایران تنازع پر تمام کارڈز ہمارے ہاتھ میں ہیں،امریکی مذاکراتی ٹیم اب پاکستان نہیں جائے گی،ٹیم نہ بھیجنے کا مطلب یہ نہیں کہ جنگ دوبارہ شروع کی جائے گی،ہم نے ابھی جنگ دوبارہ شروع کرنے کے بارے میں سوچا نہیں،پاکستان کا سفر بہت لمبا ہے،ہم یہی کام فون پر بھی مؤثر طریقے سے کر سکتے ہیں۔
یاد رہے کہ ایرانی وزیر خارجہ عباس عراقچی کی قیادت میں وفد کل رات پاکستان پہنچا ، جس دوران ایرانی وزیر خارجہ نے وزیراعظم شہبازشریف اور فیلڈ مارشل عاصم منیر کے ساتھ اہم ملاقاتیں کیں ۔ جس کے بعد وفد پاکستان سے روانہ ہو گیا اور عمان پہنچ چکا ہے جہاں ایرانی وزیر خارجہ ہم منصب سمیت اعلیٰ قیادت سے ملاقاتیں بھی کریں گے ۔اس کے بعد ایرانی وزیر خارجہ روس جائیں گے ۔
