استحکام پاکستان پارٹی (آئی پی پی) کے اجلاس میں ایران اسرائیل حالیہ کشیدگی اور خطے میں پیدا ہونے والے عدم توازن پر تشویش کا اظہار کیا گیا۔
ایران کی صورتحال پر استحکام پاکستان پارٹی کے اجلاس میں صدر آئی پی پی عبدالعلیم خان نے کہا کہ استحکام پاکستان پارٹی ایران میں ہونے والے جانی و مالی نقصان پر فکرمند ہے۔ موجودہ صورتحال نے افواج پاکستان کی ذمہ داریوں میں مزید اضافہ کر دیا ہے۔ اجلاس میں افواج پاکستان سے مکمل یکجہتی کا اظہار کیا گیا۔
وفاقی وزیر عبدالعلیم خان نے کہا کہ فیلڈ مارشل عاصم منیر نہ صرف پاکستان بلکہ پورے عالم اسلام کی امیدوں کا مرکز ہیں۔ معرکہ بنیان مرصوص میں فتح فیلڈ مارشل کے نام ہے۔ امید ہے فیلڈ مارشل دورہ امریکا میں بھی اپنے مقاصد کامیابی سے حاصل کریں گے۔
اجلاس میں رانا نذیر، صمصام بخاری، شعیب صدیقی، رفاقت گیلانی، قیصر ماہے اور سردار آصف نکئی نے شرکت کی۔ مرکزی رہنماؤں نے عبدالعلیم خان کی قیادت پر مکمل اعتماد کا اظہار کیا اور حالیہ کنونشن میں پاک فوج سے اظہار یکجہتی پر مبارکباد دی۔ اجلاس میں موجودہ ملکی صورتحال اور وفاقی و صوبائی بجٹ پر بھی تفصیلی مشاورت کی گئی۔
