پاک بحریہ نے سمندر میں زخمی بھارتی عملے کو بچانے کے لیے کامیاب ریسکیو آپریشن مکمل کیا ہے۔
پاک فوج کے شعبہ تعلقات عامہ ( آئی ایس پی آر ) کے مطابق لائبریریا کے آئل ٹینکر نے اپنے زخمی بھارتی عملے کے لیے طبی امداد کی درخواست کی تھی۔
جوائنٹ میری ٹائم انفارمیشن اینڈ کوآرڈینیشن سینٹر نے ہنگامی کال ملتے ہی فوری طور پر آپریشن شروع کیا جس کے بعد زخمی عملے کے رکن کو فوری طبی امداد کے لیے کراچی کے مقامی اسپتال منتقل کیا گیا۔
آئی ایس پی آر نے کہا کہ یہ کامیاب ریسکیو آپریشن قومیت سے بالاتر ہو کر بین الاقوامی ذمہ داریوں کو پورا کرنے کا مظہر ہے۔
آئی ایس پی آر نے مزید کہا کہ یہ اقدام سمندر میں انسانی جانوں کی حفاظت کے لیے پاک بحریہ کے مثالی کردار کا عملی ثبوت ہے۔
