وزیر دفاع خواجہ آصف کا کہنا ہے کہ وقت آگیا ہے کہ اپنی فوج کی طرح معیشت کو بھی مضبوط بنائیں، ٹیکس چوری پر قابو پالیں تو آئی ایم ایف کے پاس نہیں جانا پڑے گا۔
قومی اسمبلی اجلاس میں اظہار کرتے ہوئے وزیر دفاع خواجہ آصف نے کہا کہ ریونیو کی چوری کا حساب کروالیں، معیشت ٹھیک ہوجائے گی، کرپشن، ریونیولیکج کے خلاف بھی بنیان مرصوص ضروری ہے، کھاتے پیتے لوگوں نے بینظیر انکم سپورٹ کارڈ بنا رکھا ہے۔
وزیر دفاع نے کہا کہ ہم نے سوا سال ملک کی معیشت ریکور کرنے کی پوری کوشش کی، جب جنگ کے بادل منڈلا رہے تھے تو کہا گیا جہاز اڑانے کے لیے تیل نہیں، اپوزیشن بینچز سے بیان آیا کہ ہم نے میزائل اور گولے یوکرین کو بیچ دیے، ہم نے بھارت کے 6 طیارے گرائے،کیا وہ پانی سے گرائے تھے؟ پاکستان سے محبت کریں، کسی سے شخصی محبت نہ دکھائیں۔
خواجہ آصف نے کہا کہ پاکستان کی 77 سال کی تاریخ میں بڑے بڑے لوگ شہید ہوئے، ذوالفقار بھٹو شہید ہوا،اس کی بیٹی کو شہید کیا گیا، لیکن ذوالفقار وعلی بھٹو کی پارٹی آج بھی زندہ ہے، دہشتگردی کیخلاف جنگ میں ہزاروں فوجی اور سویلیئنز شہید ہوئے، دہشتگردوں کے ساتھ ہمدردی رکھنے والے پاکستانی نہیں ہو سکتے، ہمارے جوان عید پر بھی سیاچن میں سرحدوں کی حفاظت کرتے ہیں، میرے پاس آج تک ایک سفارش نہیں آئی کہ بیٹے کو سیاچن سے واپس بلادیں۔
انہوں نے کہا کہ بھارت کا دوسروں کے سامنے جو طلسم تھا وہ مسمار ہوا، بھارت کو پاکستان پر حملے کی بھاری قیمت ادا کرنی پڑی، ہماری کامیابی کی وجہ مسلح افواج کی مضبوطی اور عوام کا عزم تھا، میں پاکستانی عوام اور اپنی افواج کو خراج تحسین پیش کرتا ہوں، بھارت پاکستان کے خلاف پانی کو بطور ہتھیار استعمال کررہا ہے، بھارت کی طرف سے آبی جارحیت کی جا رہی ہے۔
وزیردفاع خواجہ آصف نے کہا کہ اگرکوئی کالعدم بی ایل اے کا ہمدر دہے تو وہ غدارہے، وطن کی حفاظت کیلئےپوری قوم فوج کے پیچھے کھڑی ہے، کسی ایک شخص کی پوجا کر نے سے قو میں نہیں بنتیں، پی ٹی آئی کے سوشل واریئر ریاست کوبرابھلا کہتے ہیں۔ یہ لوگ بھارت کے ایجنٹ ہیں۔
بھارتی پائلٹ ابھی نندن کی واپس سرینڈر قرار
خواجہ آصف نے کہا کہ بھارتی پائلٹ ابھی نندن کو واپس کیا جانا ایک سرینڈر تھا، اس وقت کے آرمی چیف اور وزیراعظم نے قومی وقار کو ٹھیس پہنچائی، میں نے سابقہ وزیراعظم اور آرمی چیف کا حوصلہ دیکھا تھا، میں نے آج بھی وزیراعظم اور عسکری قیادت کا حوصلہ دیکھا۔
وزیردفاع نے کہا کہ شہباز شریف اور وزیر خزانہ کی قیادت میں ہم نے ایک لمبا سفر طے کیا، کبھی کسی کے ذہن میں بھی نہ آیا کہ قومی وقارپرسمجھوتا کرنا ہے، بھارت سے جنگ کے دوران ہماری افواج کے حوصلے بے مثال تھے، بڑی مدت بعد ریاست اور عوام میں اعتماد آیا کہ ہمارے محافظ دلیر ہیں، پاکستان ایئرفورس نے کمال کردکھایا کہ سب اش اش کر اٹھے۔ ہمیں بھارت کے خلاف جنگ میں فتح پر تاقیامت فخر رہے گا۔
یہودی ازم تمام اسلامی دنیا کا دشمن ہے،خواجہ آصف
خواجہ آصف نے کہا کہ کل ایران پر جو حملہ کیا گیا اس کی بھرپور مذمت کرتا ہوں، ایران کی ایٹمی تنصیبات اور شخصیات کو چن چن کے نشانہ بنایا گیا، ایران پر حملے میں اسرائیل اکیلا نہیں ہے، اسرائیل کو انٹیلی جنس اور کوور ہر چیز فراہم کی گئی، آج ایسے اقدامات کی ضرورت ہے جس سے عالم اسلام کا اتحاد نظر آئے۔
وزیر دفاع نے کہا کہ اسرائیل بچوں اور خواتین کا قاتل اور فلسطین کی تباہی کا ذمہ دار ہے، اسرائیل کے ہاتھ فلسطینیوں سمیت مسلمانوں کے خون سے رنگے ہیں، مسلمانوں کو اسرائیل سے ہاتھ نہیں ملانا چاہیے، یہودی ازم تمام اسلامی دنیا کا دشمن ہے۔
انہوں نے مزید کہا کہ ایرانی بھائیوں سے مکمل یکجہتی کا اظہار کرتے ہیں، اپنے ایرانی بھائیوں کے ساتھ ہر طریقے سے کھڑے ہیں، اسرائیل نے ایران پر حملہ کیا،جنگ ابھی جاری ہے، ایران کے ساتھ پاکستان کے دیرینہ تعلقات ہیں،جن اسلامی ممالک کے اسرائیل سےروابط ہیں وہ فوری منقطع کریں. اسرائیل نے یمن، ایران اور فلسطین کو نشانہ بنارکھا ہے، او آئی سی اجلاس بلاکر تمام مسلم ممالک مل کرحکمت عملی بنائیں۔
