سعودی ولی عہد شہزادہ محمد بن سلمان نے امریکی صدر ڈونلڈ ٹرمپ سے ٹیلیفونک رابطہ کیا جس میں مشرق وسطیٰ میں جاری تازہ ترین پیش رفت خصوصاً ایران کے خلاف اسرائیلی فوجی کارروائیوں پر تفصیلی گفتگو کی گئی۔
سعودی پریس ایجنسی کے مطابق دونوں رہنماؤں نے خطے میں کشیدگی کم کرنے اور صبر و تحمل کے مظاہرے کی ضرورت پر زور دیا۔ ان کا کہنا تھا کہ تنازعات کا حل صرف سفارتی ذرائع سے ممکن ہے اور طاقت کا استعمال صورتحال کو مزید بگاڑ سکتا ہے۔
ٹیلی فونک گفتگو کے دوران محمد بن سلمان اور ڈونلڈ ٹرمپ نے مشرق وسطیٰ میں امن، سلامتی اور استحکام کو فروغ دینے کے لیے مشترکہ کوششیں جاری رکھنے کے عزم کا اعادہ بھی کیا۔
یہ رابطہ ایسے وقت میں ہوا ہے جب اسرائیل اور ایران کے درمیان کشیدگی عروج پر ہے اور خطے میں ایک بڑی جنگ کے خدشات بڑھ رہے ہیں۔ دونوں رہنماؤں کی گفتگو کو ایک اہم سفارتی پیش رفت کے طور پر دیکھا جا رہا ہے۔
