نائب وزیراعظم و وزیر خارجہ سینیٹر محمد اسحاق ڈار نے عیدالاضحیٰ کے موقع پر ترکی، مصر اور آذربائیجان کے وزرائے خارجہ سے ٹیلی فونک رابطے کیے اور باہمی مبارکباد کا تبادلہ کیا جلکہ ان رابطوں کے دوران دوطرفہ تعلقات، علاقائی امور اور امت مسلمہ کی سلامتی و خوشحالی کے لیے دعائیں کی گئیں۔
ترک وزیر خارجہ سے رابطہ
اسحاق ڈار نے ترکیہ کے وزیر خارجہ ہاکان فیدان سے گفتگو کی جس کے دوران دونوں رہنماؤں نے عیدالاضحیٰ کی مبارکباد دی اور فلسطینی عوام سمیت پوری امت مسلمہ کی فلاح و سلامتی کے لیے دعا کی۔
مصر کے وزیر خارجہ سے بات چیت
نائب وزیراعظم نے مصر کے وزیر خارجہ بدر عبدالعاطی سے بھی ٹیلی فونک رابطہ کیا اور دونوں رہنماؤں نے ایک دوسرے کو عید کی مبارکباد پیش کی اور عالم اسلام، خصوصاً غزہ کے مسلمانوں کے لیے امن و خوشحالی کی دعا کی۔
آذربائیجان کے وزیر خارجہ سے رابطہ
اسحاق ڈار نے آذربائیجان کے وزیر خارجہ جیہون بائراموف سے بھی ٹیلی فون پر بات کی اور گفتگو کے دوران دوطرفہ تعلقات اور کثیرالجہتی تعاون کو مزید مضبوط کرنے پر تبادلہ خیال کیا گیا۔
دونوں رہنماؤں نے خطے کی صورتحال اور باہمی دلچسپی کے امور پر بھی بات کی جبکہ عیدالاضحیٰ کی مبارکباد دیتے ہوئے امت مسلمہ کی سلامتی کے لیے دعائیں کیں۔
