صدر مملکت نے پاکستان اور بنگلہ دیش کو قریب لانے پر زور دیا ہے۔ آصف زرداری کا کہنا ہے کہ اس نسل سے تعلق رکھتا ہوں جس نے ہمیں علیحدہ ہوتے دیکھا، نوجوان نسل علیحدگی کے درد کو نہیں سمجھ سکتی، اللہ تعالیٰ نے پاکستان کی طرح بنگلہ دیش کو بھی وسائل سے نوازا ہے، ایسے اقدامات کرنا ہوں گے جس سے عوام خوشحال ہوں، دونوں ملکوں کے درمیان تعاون کے وسیع مواقع موجود ہیں، نوجوان نسل کو باہمی رابطے بڑھانے کی ضرورت ہے۔
صدر مملکت آصف علی زرداری نے پاکستان اور بنگلہ دیش کی کرکٹ ٹیموں کے اعزاز میں گزشتہ رات عشائیے میں شرکت کی، اس موقع پر کھلاڑیوں اور آفیشلز کے ساتھ گرم جوشی سے مصافحہ بھی کیا۔
رپورٹ کے مطابق چیئرمین پی سی بی محسن نقوی کی جانب سے دونوں ٹیموں کے اعزاز میں تقریب کا انعقاد کیا گیا، جس کے مہمان خصوصی صدر مملکت تھے۔
President of Pakistan Asif Ali Zardari, hosted a reception in honour of the Pakistan and Bangladesh cricket teams, along with match officials, at the Governor's House in Lahore. pic.twitter.com/k7FI8tIYy1
— Pakistan Cricket (@TheRealPCB) June 1, 2025
انہوں نے کہا کہ حالیہ سیریز میں قومی ٹیم کی کارکردگی اچھی رہی، اس نسل سے تعلق رکھتا ہوں جس نے ہمیں علیحدہ ہوتے دیکھا، آج کل کی نسل علیحدگی کے درد کی کیفیت کو نہیں سمجھ سکتی، بنگلہ دیشی خطے کی امیر ترین قوموں میں سے تھی۔
صدر مملکت کا کہنا ہے کہ پاکستان اور بنگلہ دیش کو قریب لانے کیلئے کام کرنے کی ضرورت ہے، ہمیں دونوں ملکوں کے عوام کی فلاح و بہبود کیلئے کام کرنا ہوگا، مل کر ایسے اقدامات کرنا ہوں گے جس سے دونوں ملکوں کےعوام خوشحال ہوں۔
آصف زرداری نے کہا کہ بنگلہ دیش دنیا میں ایک کامیاب ملک کے طور پر جانا جاتا ہے، اللہ تعالیٰ نے پاکستان کی طرح بنگلہ دیش کو بھی وسائل سے نوازا ہے، دونوں ملکوں کے درمیان تعاون کے وسیع مواقع موجود ہیں، دونوں ملکوں کی نوجوان نسل کو باہمی رابطے بڑھانے کی ضرورت ہے، کھیل باہمی رابطوں کا اہم ذریعہ ہیں۔
