اسلام آباد یونائیٹڈ کو ایلیمنیٹر سے قبل جھٹکا، اسٹار انگلش بیٹر ایلکس ہیلز کا ساتھ دستیاب نہیں ہوگا۔
پی ایس ایل 10 کے ایلیمنیٹر سے قبل اسلام آباد یونائیٹڈ کی ٹیم کے اسٹار بیٹر ایلکس ہیلز کو وطن واپس لوٹنا ہے وہ آئندہ میچز کیلئے دستیاب نہیں ہوں گے۔
رپورٹ کے مطابق انگلش بیٹر ایلکس ہیلز صرف دو میچز کے لیے پاکستان آئے تھے، نجی مصروفیات کے باعث ہیلز کو واپس لوٹنا ہے۔
واضح رہے کہ پاک بھارت جنگ کے باعث پاکستان سپر لیگ 10 کے میچز ملتوی کردیئے گئے تھے، حالات معمول پر آنے کے بعد ایونٹ کا 17 مئی سے دوبارہ آغاز ہوا تھا۔
اسلام آباد یونائیٹڈ نے ایلکس ہیلز کی عدم دستیابی پر جاری وضاحتی بیان میں کہا ہے کہ پی ایس ایل شیڈول میں تبدیلی کے باعث ایلکس ہیلز بقیہ میچز کے لیے دستیاب نہیں ہوں گے، ایلکس ہیلز 18 مئی کے بعد ذاتی مصروفیت کے باعث اسپین روانہ ہو رہے ہیں، ایلکس ہیلز اپنے قریبی دوست کی شادی میں شرکت کیلئے اسپین جا رہے ہیں۔
فرنچائز کا کہنا ہے کہ اسلام آباد یونائیٹڈ اور ایلکس ہیلز کے درمیان یہ بات معاہدے کے وقت طے ہو گئی تھی، ایلکس ہیلز ہمیشہ اسلام آباد یونائیٹڈ فیملی کا حصہ رہیں گے
ایلکس ہیلز نے اس حوالے سے کہا کہ اسلام آباد یونائیٹڈ میرے لیے فیملی کی طرح ہے، اسلام آباد یونائیٹڈ کیلئے کھیل کر ہمیشہ خوشی ہوتی ہے، اس سیزن ٹیم کا دوبارہ حصہ بننا بہترین تجربہ تھا، پلے آف کیلئے ٹیم کو نیک خواہشات، اسپین سے ٹیم کو سپورٹ کروں گا۔
