صدر مملکت آصف علی زرداری اور وزیر اعظم شہبازشریف نے آرمی چیف عاصم منیر کو فیلڈ مارشل کے عہدے پر ترقی پانے پر مبارک باد پیش کی ہے۔
وفاقی وزرا ، چیئرمین جوائنٹ چیفس آف اسٹاف کمیٹی اور سروسز چیفس کی جانب سے بھی مبارک باد پیش کی گئی ہے۔
گورنر سندھ کا بیان
گورنر سندھ کامران ٹیسوری نے بھی جنرل سید عاصم منیر کو فیلڈ مارشل بننے پر مبارک باد دی اور کہا کہ دشمن کو شکست فاش دینے پر سپہ سالار سید عاصم منیر اس عہدہ کے اصل حقدار تھے۔
گورنر سندھ کا کہنا تھا کہ آپریشن بنیان مرصوص میں اعلیٰ حکمت عملی سپہ سالار جنرل سیدعاصم منیرکی صلاحیتوں کا واضح اظہار تھا۔
وزیر داخلہ کی مبارکباد
وفاقی وزیر داخلہ محسن نقوی نے کہا ہے کہ معرکہ حق کی شاندار فتح کے بعد فیلڈ مارشل کے عہدہ پر ترقی جنرل سید عاصم منیر کا حق تھا۔
محسن نقوی نے فیلڈ مارشل کے عہدے پر ترقی ملنے پر جنرل سید عاصم منیر کو مبارکباد پیش کرتے ہوئے ان کے لیے نیک تمناؤں کا اظہار کیا اور کہا کہ آرمی چیف جنرل سید عاصم منیر نے محنت، صلاحیتوں اور پیشہ وارانہ مہارت سے یہ مقام حاصل کیا ہے۔
وزیر داخلہ کا کہنا تھا کہ جنرل سید عاصم منیر کی قیادت میں مسلح افواج نے دشمن کو عبرتناک سبق سکھایا، قوم دشمن کیخلاف سیسہ پلائی دیوار بن کر مسلح افواج کے شانہ بشانہ کھڑی رہی، اس کا کریڈٹ جنرل سید عاصم منیر کو جاتا ہے۔
انہوں نے کہا کہ جرات، شجاعت، تدبر، حکمت اور دانش کا جو مظاہرہ جنرل عاصم منیر نے دکھایا اسکی مثال نہیں ملتی، یقین ہے کہ جنرل سید عاصم منیر کی قیادت میں پاک فوج نئی بلندیوں تک جائیگی۔
ان کا مزید کہنا تھا کہ جنرل سید عاصم منیر کی قیادت میں مسلح افواج کی مزید کامیابیوں اور کامرانیوں کیلئے دعاگو ہوں۔
وزیر اعلیٰ پنجاب کی مبارکباد
وزیراعلی پنجاب مریم نواز کی جانب سے بھی جنرل عاصم منیر کو فیلڈ مارشل کے عہدے پر ترقی ملنے پر مبارکباد پیش کی گئی۔
اپنے پیغام میں وزیراعلیٰ مریم نواز نے فیلڈ مارشل جنرل عاصم منیر کیلئے نیک تمناؤں کا اظہار کیا اور کہا کہ انہوں نے ملک و قوم کیلئے قابلِ قدر خدمات سر انجام دیں۔
مریم نواز کا کہنا تھا کہ دعا ہے جنرل عاصم منیر کی قیادت میں پاک فوج پیشہ ورانہ مہارت کی بلندی تک پہنچے۔
وزیراعلیٰ بلوچستان کی مبارکباد
وزیر اعلیٰ بلوچستان سرفراز بگٹی نے اپنے پیغام میں کہا کہ جنرل عاصم منیر قوم کے قابلِ فخر سپوت ہیں، انہوں نے فوجی قیادت کو نئی جہت دی اور ملک کے دفاع، امن و قومی یکجہتی میں ان کی خدمات تاریخ کا روشن باب ہیں۔
ان کا کہنا تھا کہ درپیش چیلنجز سے نمٹنے کی حکمت عملی قومی مفاد اور دور اندیشی سے بھرپور ہے، فیلڈ مارشل کا اعزاز بے مثال عسکری قیادت کا اعتراف ہے۔
انہوں نے کہا کہ بلوچستان کے امن و ترقی میں بھی جنرل عاصم منیر کا کردار قابل تحسین ہے اور انکی رہنمائی میں پاکستان ترقی و سلامتی کی راہ پر گامزن ہے، پوری قوم کو ان کی قیادت پر فخر ہے، ملک محفوظ ہاتھوں میں ہے۔
