سپریم کورٹ نے سابقہ فاٹا اور پاٹا میں سیلز ٹیکس ترمیمی ایکٹ بحال کردیا، گھی اور اسٹیل ملز ایسوسی ایشن کی اپیلوں پر حکم امتناع جاری کردیا۔ پشاور ہائیکورٹ کا فیصلہ معطل کرتے ہوئے فریقین کو نوٹس جاری کر دیے۔ سماعت غیرمعینہ مدت تک ملتوی کر دی گئی۔
جسٹس امین الدین خان کی سربراہی میں سپریم کورٹ کے 5 رکنی آئینی بینچ نے سابقہ فاٹا اور پاٹا میں سیلز ٹیکس ترمیمی ایکٹ بحال کردیا، عدالت نے گھی اور اسٹیل ملز ایسوسی ایشن کی اپیلوں پر حکم امتناع جاری کردیا۔
پشاور ہائیکورٹ نے سابقہ فاٹا اور پاٹا میں سیل زٹیکس ترمیمی ایکٹ کالعدم قرار دیا تھا، فیصلے کو سپریم کورٹ کے آئینی بینچ نے معطل کردیا۔
وکیل اسٹیل ملز ایسوسی ایشن نے دلائل دیتے ہوئے کہا کہ ہائیکورٹ پارلیمان کے متبادل قانون سازی نہیں کر سکتی، ہائیکورٹ درخواست میں کی گئی استدعا سے بڑھ کر ریلیف نہیں دے سکتی۔
حافظ احسان کھوکھر کا کہنا تھا کہ پشاور ہائیکورٹ نے اختیارات سے تجاوز کیا ہے، اربوں روپے کے ٹیکس کا معاملہ ہے، فاٹا اور پاٹا کیلئے کسٹمز کلیئرنس کرواتے وقت ہی آرڈر دینا ہوتا تھا۔
گھی و اسٹیل ملز ایسوسی ایشن کے وکیل نے دلائل دیتے ہوئے کہا کہ عدالت نے قانون سے ہٹ کر چیک دینے کا حکم دے دیا۔
عدالت نے پشاور ہائیکورٹ کا فیصلہ معطل کرتے ہوئے فریقین کو نوٹس جاری کردیے۔ سپریم کورٹ نے اپیلوں پر مزید سماعت غیرمعینہ مدت تک ملتوی کردی۔
