آپریشن بنیان مرصوص کے دوران پاک فضائیہ نے بھارتی فضائیہ کو منہ توڑ جواب دیتے ہوئے متعدد لڑاکا طیاروں کو مختلف علاقوں میں مار گرایا۔
سیکیورٹی ذرائع کے مطابق پاک فضائیہ کی جوابی کارروائیوں نے بھارتی فضائیہ کے جنگی اثاثوں کو شدید نقصان پہنچایا جس کے نتیجے میں کئی بھارتی پائلٹس زخمی یا لاپتہ ہوئے۔
سیکیورٹی ذرائع نے بتایا کہ ایک بھارتی لڑاکا طیارہ اننت ناگ کے علاقے میں گر کر تباہ ہوا جہاں پائلٹ کی ہلاکت کا خدشہ ظاہر کیا جا رہا ہے اور اس طیارے کی ایجیکشن سیٹ پہی گاڈول، کوکرناگ سے برآمد ہوئی۔
ایک اور طیارہ پامپور یا پلوامہ کے علاقے میں تباہ ہوا جس کے دونوں پائلٹس شدید زخمی حالت میں سری نگر کے اسپتال منتقل کیے گئے۔
اسی طرح ضلع رام بن کے رامسو میں ایک اور لڑاکا طیارہ گر کر تباہ ہواجبکہ اس کے پائلٹ، فلائنگ آفیسر اقبال سنگھ زخمی حالت میں ادھم پور کے آرمی ہسپتال منتقل کیے گئے۔
بھردہ کلاں تحصیل اکھنور کے زرعی کھیتوں میں گرنے والے ایک اور طیارے کے دونوں پائلٹس زخمی ہوئے اور انہیں اکھنور کے فوجی اسپتال منتقل کیا گیا۔
سیکیورٹی ذرائع کے مطابق بھارتی فضائیہ کا ایک طیارہ بھٹنڈہ کے علاقے میں بھی تباہ ہوا۔
مزید برآں بھارت کا ایک ہیرون ریموٹ پائلٹڈ وہیکل (ڈرون) جموں شہر سے 13 ناٹیکل میل مشرق میں مار گرایا گیا۔
