صدر استحکام پاکستان پارٹی عبدالعلیم خان کا کہنا ہے کہ پاک فوج ارض وطن کی حفاظت کیلئے ہمیشہ تیار ہے۔ پاک بھارت صورتحال بگڑی تو دشمن کے دانت کھٹے ہونگے۔
صدر استحکام پاکستان پارٹی اور وفاقی وزیرعبدالعلیم خان سے سیاسی شخصیات سے ملاقاتیں کیں۔ وفود سے گفتگو میں صدر آئی پی پی عبدالعلیم خان کا کہنا تھا کہ پاک بھارت صورتحال بگڑی تو دشمن کے دانت کھٹے ہونگے۔
وفاقی وزیرعبدالعلیم خان نے کہنا تھا کہ پاک فوج ارض وطن کی حفاظت کیلئے ہمیشہ تیار ہے، 25 کروڑعوام کی سوہنی دھرتی کو اللہ تعالٰی ہمیشہ محفوظ رکھے گا۔ ہر گلی کوچے سے "اے وطن تو نے پکارا" کےنعرے بلند ہونگے۔
صدر استحکام پاکستان پارٹی نے کہا کہ ہر محب وطن پاکستانی اپنی فوج سے دو قدم آگے کھڑا ہے۔ 60 برس قبل جمخانہ کلب میں چائے پینے کی خواہش کی طرح اب پھر ناکامی ہوگی۔ بھارت گذشتہ دو ہفتوں سے اپنے ہی گرداب میں پھنسا ہوا ہے۔ اقوام عالم میں تنہائی کے بعد اب جگ ہنسائی دشمن کا مقدر ہے۔ پاک فوج کو خداداد صلاحیتوں سے بھارت پر نفسیاتی برتری ہے۔
عبدالعلیم خان سے این اے 117 سے سیاسی عمائدین کی بڑی تعداد نے ملاقاتیں کیں۔ ملاقات کرنے والوں میں جنرل سیکرٹری آئی پی پی میاں خالد محمود، صدر پنجاب رانا نذیراحمد، ایم پی اے شعیب صدیقی، ملک زمان نصیب، میاں جنید ذوالفقار،ہارون عمران گل شامل ہیں۔
اس موقع پر مختلف یونین کونسلوں کےنمائندوں، سابق کونسلرز اور رہنماؤں کی آئی پی پی میں شمولیت اختیار کی۔ آئی پی پی کے شعبہ خواتین اور سٹوڈنٹس فورم کے وفود نے بھی عبدالعلیم خان سے ملاقاتیں کرکے این اے 117 میں بے مثال ترقیاتی کاموں پر ان سے اظہار تشکر کیا۔
