خیبر پختونخوا کے ضلع بونیر کے علاقے گلبانڈی پولیس اسٹیشن کی حدود میں پولیس اور دہشت گردوں کے درمیان شدید فائرنگ کا تبادلہ ہوا جس کے نتیجے میں اے ایس آئی انور محمود شہید ہو گئے۔
پولیس حکام کے مطابق دہشت گردوں نے رات کی تاریکی کا فائدہ اٹھاتے ہوئے حملہ کیا اور بعد ازاں موقع سے فرار ہونے میں کامیاب ہو گئے۔ واقعے کے بعد سیکیورٹی فورسز نے علاقے کو گھیرے میں لے کر ملزمان کی تلاش کے لیے سرچ آپریشن شروع کر دیا ہے۔
شہید اے ایس آئی انور محمود بہادری سے مقابلہ کرتے ہوئے جامِ شہادت نوش کر گئے، ان کی قربانی کو خراج تحسین پیش کرتے ہوئے پولیس افسران نے عزم ظاہر کیا ہے کہ واقعے میں ملوث عناصر کو جلد قانون کے کٹہرے میں لایا جائے گا۔
بنوں میں دہشتگردوں کی فائرنگ سے زخمی ہونے والا سی ٹی ڈی کا اہلکار عمران اسپتال میں زخموں کی تاب نہ لاتے ہوئے شہید ہو گیا۔ پولیس کے مطابق شہید اہلکار کو دو روز قبل تھانہ ڈومیل کی حدود میں دہشتگردوں اور سی ٹی ڈی اہلکاروں کے درمیان جھڑپ کے دوران شدید زخمی کیا گیا تھا۔
اس جھڑپ میں اب تک مجموعی طور پر چار اہلکار شہید ہو چکے ہیں۔ پولیس کا کہنا ہے کہ زخمی اہلکار عمران کو فوری طور پر اسپتال منتقل کیا گیا تھا جہاں وہ زیرِ علاج تھا مگر جانبر نہ ہو سکا۔ واقعے کے بعد علاقے میں سیکیورٹی مزید سخت کر دی گئی ہے جبکہ دہشتگردوں کے خلاف سرچ آپریشن بھی جاری ہے۔
دوسری جانب نامعلوم سمت سے بنوں کینٹ میں دو راکٹ گولے آگرے، ایک گولہ ہائی کورٹ کے احاطے میں آگرا، راکٹ گولے گرنے سے کوئی جانی نقصان نہیں ہوا ہے۔
