ڈچس آف سسیکس میگھن مارکل نے پرنس ہیری سے علیحدگی کی خبروں کو من گھڑت قرار دے دیا۔ پرنس ہیری سے اظہار محبت کرتے ہوئے انہوں نے کہا کہ آج بھی ہمارے رشتے میں ہنی مون پیریڈ والا لطف موجود ہے۔
برطانوی شاہی خاندان کی بہو میگھن مارکل نے بالآخر پرنس ہیری سے علیحدگی کی خبروں پر خاموشی توڑ دی، میگھن نے حالیہ پوڈ کاسٹ میں واضح انداز میں ان افواہوں کو جھوٹا قرار دے کر اپنے مضبوط اور خوبصورت رشتے کی تصدیق کردی۔
میگھن مارکل نے اپنی قریبی دوست اور آئی ٹی کاسمیٹکس کی سی ای او جیمی کرن لیما کے پوڈکاسٹ میں شرکت کی۔ اس دوران انہوں نے ناصرف اپنے شوہر پرنس ہیری سے محبت کا اظہار کیا بلکہ یہ بھی کہا کہ ان کے رشتے میں آج بھی ہنی مون پیریڈ والا لطف موجود ہے۔
پوڈکاسٹ میں گفتگو کرتے ہوئے میگھن نے کہا کہ پرنس ہیری مجھ سے بے پناہ محبت کرتے ہیں، ہم نے خوبصورت زندگی بنائی ہے، دو صحتمند اور پیارے بچے ہیں، مجھے لگتا ہے جیسے یہ سب سپر ماریو گیم کے آخری لیول کی طرح ہے، ہیرو آتا ہے ڈریگن کو مارتا ہے اور شہزادی کو بچاتا ہے، میرے شوہر بھی وہی ہیرو ہیں اور اگر آپ نے غور نہیں کیا تو بتا دوں، وہ بہت ہینڈسم ہیں لیکن ان کا دل ان کے چہرے سے بھی زیادہ خوبصورت ہے۔
انہوں نے مزید کہا کہ میں اور ہیری 7 سال سے ایک دوسرے کے ساتھ ہیں اور ہمارا تعلق وقت کے ساتھ مزید مضبوط ہوا ہے، جب تعلق کی ابتداء ہوئی تو سب کچھ تتلیوں جیسا تھا، لیکن 6 مہینے بعد ہی ہم زندگی کی مشکلات میں ایک ساتھ کھڑے ہوگئے، اب 7 سال بعد تھوڑا سا سکون ملا ہے اور ہم ایک دوسرے کو نئے انداز میں محسوس کررہے ہیں، اسی لیے مجھے لگتا ہے کہ یہ اب ہمارا اصل ہنی مون پیریڈ ہے۔
یاد رہے کہ میگھن مارکل اور پرنس ہیری کی شادی 2018ء میں ونڈسر کیسل میں ہوئی تھی، جسے دنیا کی سب سے زیادہ دیکھی جانے والی شاہی شادی قرار دیا گیا۔
شاہی جوڑے نے 2019ء میں اپنے پہلے بیٹے پرنس آرچی اور 2021ء میں بیٹی پرنسس لیلیبٹ کو خوش آمدید کہا، یہ شاہی جوڑا امریکا میں اپنے بچوں کے ساتھ مقیم ہے۔
