پہلگام فالس فلیگ آپریشن کے بعد بھارت کی جانب سے لائن آف کنٹرول پر بلااشتعال فائرنگ کا سلسلہ جاری ہے، کیانی اور منڈل سیکٹر میں بھارتی فوج کی جانب سے فائرنگ کی گئی، پاک فوج نے بھرپور جوابی کارروائی کی۔ دوسری جانب بھارت کی جنگی دھمکیوں کے بعد کنٹرول لائن پر بسنے والوں کے حوصلے بلند ہیں، وطن کا دفاع کرنے کیلئے شہری پُرعزم ہیں، زیر زمین پناہ گاہوں کو بھی قابل استعمال بنالیا گیا۔
سیکیورٹی ذرائع کے مطابق 29 اور 30 اپریل کی درمیانی شب بھارت نے لائن آف کنٹرول پر سیز فائر کی سنگین خلاف ورزی کی، بھارتی فورسز کی جانب سے کیانی اور منڈل سکیٹر میں بلااشتعال فائرنگ کی گئی، بھارت کی جانب سے چھوٹے ہتھیاروں کا استعمال کیا گیا۔
سیکیورٹی ذرائع کے مطابق پاک فوج نے بھرپور جوابی کارروائی کرتے ہوئے بھارتی فوج کو منہ توڑ جواب دیا، مؤثر جواب سے دشمن کی گنوں کو خاموش کروا دیا گیا۔
ذرائع کا کہنا ہے کہ پاکستان فوج کے مؤثر جواب سے دشمن کے متعدد مورچے تباہ ہونے کی بھی اطلاعات ہیں، مقبوضہ کشمیر میں واقع لائن آف کنٹرول پر بھارتی چکپترا پوسٹ کو تباہ کردیا گیا۔
رپورٹ کے مطابق اس سے قبل بھارت نے مقبوضہ کشمیر کے سرحدی علاقوں کو بھی خالی کروالیا ہے اور مسلمانوں کیخلاف کریک ڈاؤن جاری ہے، بھارت کی طرف سے یہ اشتعال انگیزی اس کے جنگی جنون کی غماز ہے، پاک فوج ملکی سالمیت کے دفاع کیلئے ہمہ وقت تیار ہے۔
دوسری جانب بھارت کی جنگی دھمکیوں کے باوجود کنٹرول لائن پر بسنے والوں کے حوصلے بلند ہیں، شہری وطن کا دفاع کرنے کیلئے پرعزم ہیں، زیر زمین پناہ گاہوں کو بھی قابل استعمال بنالیا۔
وادی نیلم سمیت آزاد کشمیر کے کنٹرول لائن پر واقع علاقوں میں معمولات زندگی بحال ہیں، مقامی لوگ ماضی کی طرح بھارتی کی طرف سے ہر قسم کی متوقع جارحیت سے نمٹنے کیلئے بھی تیار ہیں۔
