پہلگام واقعہ نے مودی سرکار کےمقبوضہ کشمیر میں امن اور سیاحت کے دعووں کا پردہ چاک کردیا ہے، دفاعی ماہرین کاکہناہے کہ مودی نے آرٹیکل 370 کو منسوخ اور نئے کشمیر کا نعرہ لگا کر کشمیر کو خون میں نہلا دیا۔
مقبوضہ وادی کے لوگوں نے جذبات کا اظہار کرتے ہوئے کہاکہ مقبوضہ کشمیر میں ہربات کا الزام مسلمانوں پرعائد کیا جاتا ہے جواب کشمیری برداشت نہیں کریگا،کشمیر کچھ لوگوں کیلئے انڈسٹری ہے اور اس میں کشمیری را میٹیریل ہے، کشمیری کے دل میں کیا ہے وہ کوئی بھی سننا نہیں چاہتا، پہلگام میں اتنے لوگ مارے گئے افسوس ہے، اس میں ہمارا بھائی عابد بھی گیا اس کا نام کسی نے نہیں لیا، پہلگام میں جنہوں نے حملہ کیا وہ مسلمان نہیں تھے، قرآن پاک میں لکھا ہے کہ ایک بے گناہ کا قتل پوری انسانیت کا قتل ہے۔
کشمیری شہری نے کہا کہ اسلام نے تو عورتوں، بچوں ، بزرگوں اور نہتےپر جنگ میں بھی حملہ کرنے سے منع کیا ہے، کشمیر میں آج تک کبھی بھی سیاحوں پرحملہ نہیں ہوا تھا، کشمیریوں سے روزگار کے وعدے کئے گئے مگر ملا کچھ بھی نہیں، بھارت اللہ کے بھروسے پر ہی چل رہا ہے، اس میں سرکار کہیں ہے ہی نہیں، جمہوریت کا مطلب ہے عوام کی حکومت، کیا کشمیر میں عوامی حکومت ہے۔۔؟
شہریوں کا کہناتھا کہ پہلگام حملےمیں کوئی ایسی ویڈیو نہیں دیکھی جس میں نظر آئے کہ اس بندے نے کسی کو مارا، کسی ویڈیو میں یہ نہیں دیکھا کہ وہ پوچھے تمہارا مذہب کیا ہے، ابھی تک یہ بھی پتہ نہیں چلا کہ وہ کون لوگ تھے بس انہوں نے فوج کی وردیاں پہنی تھیں، یہ سب کچھ مسلمانوں سے کیوں جوڑا جا رہا ہے، اگر آج میری بہن کے ساتھ غلط ہوگا تو پھر بدلہ تو لیا جائے گا، کشمیر میں دس لاکھ فوج ہے، یہاں توغلط پوسٹ کرنے پر بندہ اٹھا لیا جاتا ہے۔
شہری نے کہا کہ کشمیر میں اتنی فوج لگائی ہے وہ کیا کر رہی ہے، اگروہاں 2 ہزارسیاح تھے تو ان کیلئے سکیورٹی کیوں نہیں تھی؟ مقبوضہ کشمیر کے مسلمان اب سمجھ چکے ہیں کہ بھارت کے زیر سایہ کشمیر جلتا رہے گا۔
دفاعی ماہرین کا کہناتھا کہ مقبوضہ کشمیر میں سر، سر کی چارد، زبان، مذہب غرض یہ کہ کچھ بھی محفوظ نہیں، کشمیر کا ایک ہی حل ہے اور وہ ہے بھارت سے آزادی۔
