بھارت کے مشہور کامیڈی ڈرامے ’’تارک مہتا کا الٹا چشمہ‘ کے 48 سالہ اداکار نے خودکشی کرلی۔
بھارتی میڈیا کے مطابق معروف کامیڈی ڈرامے کے اداکار للت منچندا کی لاش میرٹھ میں ان کے گھر سے لٹکی ہوئی ملی، پولیس نے ان کی موت کی وجہ خودکشی قرار دی ہے۔
اداکار کے قریبی افراد کا کہنا ہے کہ وہ پچھلے چند مہینوں سے شدید ذہنی دباؤ اور مالی مسائل کا سامنا کر رہے تھے۔
پولیس کی ابتدائی تحقیقات میں کہا گیا ہے کہ اس میں کسی تیسرے فریق کا عمل دخل نہیں تھا، موقع سے کوئی خودکشی کا نوٹ بھی نہیں ملا تاہم اس حوالے سے مزید تحقیقات کی جارہی ہیں۔
بھارتی میڈیا کے مطابق للت منچندا نے متعدد مشہور بھارتی ڈراموں کے علاوہ بالی ووڈ میں بھی کام کیا ہے۔ انہیں تارک مہتا کا الٹا چشمہ، یہ رشتہ کیا کہلاتا ہے اور کرائم پیٹرول سیریز میں ادا کیے گئے کرداروں سے شہرت ملی۔
