وزیر اعلیٰ پنجاب مریم نواز نے کہا ہے کہ مہنگائی کم ہو رہی ہے، سرمایہ کاری بڑھ رہی ہے اور پاکستان کی طرف پوری دنیا کی نظریں ہیں۔
لاہور میں تین روزہ پنجابی کلچر ڈے کی رنگا رنگ تقریبات سے خطاب کرتے ہوئے وزیراعلیٰ پنجاب مریم نواز نے کہا کہ ایک وقت تھا جب پاکستان کے دیوالیہ ہونے کی باتیں ہو رہی تھیں لیکن آج پاکستان اسٹاک ایکسچینج ریکارڈ توڑ رہی ہے۔
وزیر اعلیٰ پنجاب نے کہا کہ وسائل وہی ہیں لیکن محب وطن قیادت نے انہیں عوام کی فلاح پر خرچ کیا جس سے ملک ترقی کی راہ پر گامزن ہے۔
مریم نواز نے کہا کہ جب سوچتی ہوں کہ 15 کروڑ لوگوں کے لیے کچن چلانا کتنا مشکل ہے تو رات کو نیند نہیں آتی، میری کوشش ہے کہ ہر شخص دو وقت کی روٹی کھا کر سکون سے سو سکے۔
انہوں نے زور دیا کہ مہنگائی کم ہو رہی ہے، سرمایہ کاری بڑھ رہی ہے اور پاکستان کی طرف پوری دنیا کی نظریں ہیں۔
پنجابی ثقافت پر فخر کا اظہار کرتے ہوئے انہوں نے کہا کہ پنجاب ایک خوبصورت صوبہ ہے اور ہمیں اپنی زبان اور ثقافت پر فخر ہونا چاہیے جیسے ترکیہ کے لوگ اپنی ثقافت پر فخر کرتے ہیں۔
انہوں نے عارف لوہار کے گانے "اک پھل موتیے دا" کو اپنا پسندیدہ قرار دیا اور کہا کہ وہ بچپن سے پنجابی ڈراموں اور گانوں کی شوقین رہی ہیں۔
وزیراعلیٰ نے سعودی عرب میں اپنے قیام کے دوران بارش کے بعد مٹی کی خوشبو کو یاد کرتے ہوئے جذباتی لمحات شیئر کیے اور کہا کہ پنجاب میں بھی ایسی خوشبو دل کو چھو لیتی ہے۔
انہوں نے میلہ چراغاں اور 30 سال بعد منعقد ہونے والے ہارس اینڈ کیٹل شو کی کامیابی کو سراہا جس میں عوام کی بڑی تعداد نے شرکت کی۔
مریم نواز نے والدین کے احترام کی اہمیت پر زور دیتے ہوئے کہا کہ والدین کی تکریم کرنے والوں کو اللہ عزت دیتا ہے، جیسے میرے والد نواز شریف کو تین بار وزیراعظم بنایا گیا۔
انہوں نے عظمیٰ بخاری کی کاوشوں کو شاندار قرار دیا اور اعلان کیا کہ وہ جلد فنکاروں سے ملاقات کریں گی۔
مریم نواز نے پنجابی اور اردو بولنے پر فخر کا اظہار کیا اور کہا کہ ہمیں اپنی روایات اور ثقافت کو زندہ رکھنا چاہیے۔
