چیئرمین پبلک اکاؤنٹس کمیٹی جنید اکبر نے اعتراف کیا ہے کہ پاکستان تحریک انصاف میں ایک نہیں کئی دھڑے ہیں۔
میڈیا سے گفتگو کرتے ہوئے چیئرمین پبلک اکاؤنٹس کمیٹی جنید اکبر کا کہنا تھا کہ پی ٹی آئی میں ہر بندےکو آگے بڑھنے کا موقع ملتا ہے تو پھر اختلاف رائے تو ہوگا، پی ٹی آئی میں جس بندے پر بانی پی ٹی آئی کا ہاتھ ہوگا وہی آگے آئے گا۔
جنید اکبر کا کہنا تھا کہ تحریک انصاف میں صرف بانی پی ٹی آئی اور اس کے ورکرز ہیں، ابھی تو پارٹی میں کوئی بڑا نام نہیں رہ گیا سب ہمارے جیسے لوگ ہیں، تحریک انصاف کو توڑنے کی کوشش کی گئی، ذاتی ووٹ والے اب پی ٹی آئی میں نہیں ہیں ، سب چھوڑ گئے ہیں۔
انہوں نے کہا کہ پنجاب کے لوگ کیوں نہیں نکل رہے یہ سوال پنجاب کی قیادت سے پوچھا جائے۔
ان کا مزید کہنا تھا کہ خیبر پختونخوا سے تو آج بھی لوگ نکل رہے ہیں تاہم ہمارے ورکرزکو ڈرایا جاتا ہے۔
