بھارت کے مایہ ناز بیٹر اور آئی پی ایل کی ٹیم رائلز چیلنجر بنگلور کے کھلاڑی ویرات کوہلی کی دوران میچ دل کی دھڑکن تیز ہوگئی، جس پر انہوں نے مخالف ٹیم کے وکٹ کیپر کو اپنے دل کی دھڑکن چیک کرنے کا کہا۔
بھارت کے اسٹار بیٹر ویرات کوہلی آئی پی ایل میں رائل چیلنجر بنگلور کی نمائندگی کررہے ہیں، راجستھان رائلز کیخلاف بیٹنگ کے دوران رنز مکمل کرنے کے بعد انہوں نے مخالف ٹیم کے وکٹ کیپر سنجو سیمسن سے دل کی دھڑکن چیک کرنے کیلئے کہا۔
سنجو سیمسن نے وکٹ کیپنگ گلوز اتار کر کوہلی کے دل کی دھڑکن چیک کی اور ہلکا سا مسکراتے ہوئے کہا کہ سب کچھ نارمل ہے تاہم کوہلی نے دل پر اس طرح سے ہاتھ رکھا کہ جیسے انہیں کچھ تکلیف محسوس ہو رہی ہے۔
بعد ازاں ویرات کوہلی کو گراؤنڈ میں ٹریٹمنٹ لیتے بھی دیکھا گیا، کوہلی کی جانب سے دل کی دھڑکن چیک کرنے کا کہنے اور گراؤنڈ میں طبی امداد ملنے کے باعث ان کے مداحوں میں تشویش کی لہر دوڑ گئی۔
ویرات کوہلی نے آئی پی ایل میں راجستھان رائلز کیخلاف میچ میں ٹی 20 کرکٹ کی 100 ویں نصف سنچری مکمل کی، ان کی 56 رنز کی اننگز میں 24 سنگلز، 3 ڈبل، 4 چوکے اور 2 چھکے شامل تھے، ویرات کوہلی مجموعی طور پر 409 ٹی 20 میچز میں اب تک 100 ففٹیز اور 9 سنچریاں جڑ چکے ہیں۔
