پنجاب حکومت نے صوبہ بھر کے اساتذہ کیلئے نیا ڈریس کوڈ نافذ کردیا، جس کے مطابق جینز، ٹی شرٹ پہننے اور میک اپ کرنے پر پابندی ہوگی۔
حکومت سندھ کی جانب سے صوبہ بھر میں اساتذہ کیلئے ڈریس کوڈ نافذ کیا گیا تھا جس کے بعد محکمہ اسکول ایجوکیشن پنجاب نے بھی اساتذہ کیلئے نیا ڈریس کوڈ جاری کردیا۔
رپورٹ کے مطابق محکمہ کی جانب سے جاری نوٹیفکیشن کے تحت سرکاری اسکولوں میں مرد اساتذہ پر جینز اور ٹی شرٹ پہننے پر پابندی ہوگی۔
خواتین اساتذہ اور طالبات کو یہ بھی ہدایت کی گئی ہے کہ وہ ضرورت سے زیادہ میک اپ، اونچی ہیلز یا مہنگے زیورات پہن کر اسکول نہ آئیں، اس کے علاوہ خواتین اساتذہ کو دوپٹہ یا حجاب کے ساتھ شلوار قمیض پہننے کا کہا گیا ہے۔
نئے ڈریس کوڈ کا مقصد اس بات کو یقینی بنانا ہے کہ اساتذہ پیشہ ورانہ اور ثقافتی اقدار کی عکاسی کرنے والے لباس کا استعمال کریں۔
محکمہ تعلیم نے اس بات پر زور دیا ہے کہ ہدایات پر عمل نہ کرنیوالے اساتذہ کیخلاف سخت کارروائی کی جائے گی، نجی اسکولوں کو بھی ہدایت کی گئی ہے کہ وہ اپنے ڈریس کوڈ نافذ کریں۔
حکومت پنجاب کی جانب سے یہ فیصلہ تعلیمی اداروں میں نظم و ضبط اور ثقافتی اصولوں کے احترام کیلئے جاری کوششوں کا حصہ ہے۔
