آرمی چیف جنرل عاصم منیر نے جنوبی وزیرستان اور ڈیرہ اسماعیل خان کا دورہ کیا اور مغربی سرحد پر تعینات افسران اور جوانوں کے ساتھ عیدالفطر منائی۔
پاک فوج کے شعبہ تعلقات عامہ ( آئی ایس پی آر ) کی جانب سے جاری کردہ بیان کے مطابق آرمی چیف جنرل عاصم منیر نے جنوبی وزیرستان کےعلاقے وانا اور ڈیرہ اسماعیل خان میں چہکان کا دورہ کیا۔
آئی ایس پی آر کے مطابق آرمی چیف نے عید کی نماز ادا کی اور پاکستان کے پائیدار استحکام اور خوشحالی کیلئے دعا کی جبکہ فوجی جوانوں کے ساتھ بات چیت کی اور عیدالفطر کی مبارکباد دی اور قوم کیلئے افسروں اور جوانوں کی غیر متزلزل لگن اور مثالی خدمات کو سراہا۔
جنرل عاصم منیر کا کہنا تھا کہ آپ کا عزم نہ صرف وطن کو محفوظ رکھتا ہے بلکہ وطن سے دلی محبت کی مثال بھی ہے۔
آرمی چیف نے خیبرپختونخوا کے عوام کے شانہ بشانہ مسلح افواج اور قانون نافذ کرنے والے اداروں کی کارکردگی کو سراہا اور کہا کہ خیبرپختونخوا کے عوام نے دہشت گردی کی لعنت کیخلاف ہمیشہ بہادری کا مظاہرہ کیا۔
جنرل عاصم منیر نے فارمیشنز کی انتھک کوششوں کی تعریف کی اور کہا کہ ہماری کامیابیاں شہداء اور امن و استحکام کےعظیم مقصد کیلئے کی قربانیاں دینے والوں کی مرہون منت ہیں۔
آرمی چیف جنرل عاصم منیر کی آمد پر کور کمانڈر پشاور نے ان کا پرتپاک استقبال کیا۔
