وزیر اعلیٰ پنجاب مریم نواز نے مریضوں اور لواحقین کی شکایات پر میڈیکل سپریٹنڈنٹ ( ایم ایس ) جناح اسپتال کو معطل کرنے کا حکم دے دیا جبکہ ادویات موجود ہونے کے باوجود مریضوں کو محروم رکھے جانے پر شدید برہمی کا اظہار بھی کیا۔
پیر کے روز وزیراعلیٰ پنجاب مریم نواز اچانک صوبائی دارالحکومت کے جناح اسپتال پہنچیں جہاں مریضوں اور لواحقین سے بات چیت کی اور مسائل دریافت کیے جبکہ اس موقع پر عوام نے ادویات نہ ملنے سمیت دیگر شکایات کے انبار لگا دیئے ۔
وزیر اعلیٰ نے خاتون مریضہ کو تسلی دی اور ایمرجنسی وارڈ میں ادویات نہ ملنے پر شدید برہمی کا اظہار کیا۔
مریم نواز نے ایم ایس جناح اسپتال کے ساتھ ساتھ پرنسپل علامہ اقبال میڈیکل کالج کو بھی معطل کرنے کا حکم جاری کیا۔
اس سے پہلے وزیراعلیٰ پنجاب نے خصوصی اجلاس میں سرکاری اسپتالوں کے واجبات کی فوری ادائیگی کاحکم دیا اور ادویات کی مفت فراہمی یقینی بنانے کیلئے اقدامات اور ہر سرکاری اسپتال میں دستیاب ادویات کی فہرست آویزاں کرنے کی ہدایت کی ۔
