سینیٹر اعجاز چوہدری کے پروڈکشن آرڈر جاری کرنے کی درخواست پر سماعت عید کے بعد تک ملتوی کردی گئی۔
اسلام آباد ہائی کورٹ میں سینیٹر اعجاز چوہدری کے پروڈکشن آرڈر جاری کرنے کی درخواست پر سماعت ہوئی۔ کیس کی سماعت قائم مقام چیف جسٹس اسلام آباد ہائی کورٹ سرفراز ڈوگر نے کی۔
عدالت نے وکیل بابر اعوان سے سینیٹ اجلاس کی آئندہ تاریخ طلب کرتے ہوئے سماعت عید کے بعد تک ملتوی کر دی۔
سینیٹر اعجاز چوہدری کے وکیل بابر اعوان نے کہا کہ گزشتہ سماعت پر فریقین کو نوٹس ہوا تھا۔ کچھ جوابات آ گئے ہیں۔ البتہ جیل سپرنٹنڈنٹ اور آئی جی جیل خانہ جات کا جواب تاحال نہیں آیا۔
عدالت نے استفسار کیا کہ ابھی سینیٹ کا اجلاس تو نہیں ہے نا ؟ بابر اعوان نے جواب دیا سینیٹ اجلاس تو نہیں لیکن قائمہ کمیٹی کا اجلاس ہو رہا ہے۔ جس کمیٹی کا اجلاس ہے اس نے بھی کہا کہ اعجاز چوہدری کو پیش کریں۔
قائم مقام چیف جسٹس اسلام آباد ہائیکورٹ سرفراز ڈوگر نے کہا عید کے بعد کی تاریخ رکھ دیتے ہیں تب تک سینیٹ اجلاس کی آئندہ تاریخ پتہ کرلیں۔ مزید سماعت 8 اپریل تک ملتوی کردی گئی۔
