صدر مملکت آصف علی زرداری کا کہنا ہے کہ بلوچستان دل کے قریب ہے ۔صوبے کی ترقی اور پائیدار امن چاہتے ہیں۔ انہوں نے کہا کہ انسداد دہشت گردی ونگ کو جدید اسلحہ فراہم کیا جائے گا تاکہ امن دشمن عناصر کو مؤثر جواب دیا جا سکے۔
کوئٹہ میں صدر مملکت آصف علی زرداری کی زیر صدارت بلوچستان میں امن و امان کی صورتحال پر اہم اجلاس منعقد ہوا جس میں چیئرمین پاکستان پیپلز پارٹی بلاول بھٹو زرداری نے خصوصی شرکت کی۔اجلاس کے دوران وزیر اعلیٰ بلوچستان میر سرفراز بگٹی نے صوبے میں امن و امان کی تازہ ترین صورتحال پر بریفنگ دی۔
صدر مملکت نے اجلاس سے خطاب کرتے ہوئے کہا کہ دہشت گرد عناصر کو ہر قیمت پر شکست دیں گے۔انہوں نے واضح کیا کہ دہشت گرد قوم کو تقسیم کرنا چاہتے ہیں لیکن ریاست اپنی بقاء کے لیے ہر ممکن اقدامات کرے گی۔ انہوں نے بلوچستان کو دل کے قریب قرار دیتے ہوئے کہا کہ صوبے کی ترقی اور پائیدار امن ان کی اولین ترجیح ہے۔صدر مملکت نے اس عزم کا اظہار کیا کہ بلوچستان کے ہر بچے کو اسکول میں دیکھنا چاہتے ہیں اور جدید ٹیکنالوجی سے بچوں کو روشناس کرانا وقت کی اہم ضرورت ہے۔اجلاس میں قائم مقام گورنر بلوچستان کیپٹن ریٹائرڈ عبدالخالق اچکزئی، چیف سیکرٹری بلوچستان شکیل قادر خان، آئی جی پولیس معظم جاہ انصاری سمیت اعلیٰ حکام نے شرکت کی۔
