وفاقی حکومت نے عیدالفطر پر سرکاری تعطیلات کا اعلان کر دیا۔ اس حوالے سے کابینہ ڈویژن نے نوٹیفکیشن جاری کر دیا ہے۔
نوٹیفکیشن کے مطابق پیر 31 مارچ سے بدھ 2 اپریل تک تعطیلات ہوں گی ، تمام سرکاری دفاتر تین دن بند رہیں گے ، تین اپریل سے سرکاری دفاتر معمول کے مطابق کھلیں گے۔
وفاقی اداروں کے ملازمین 29 مارچ سے ہفتے اور اتوار کی ہفتہ وار تعطیلات بھی عید کی چھٹیوں کے ساتھ ملا سکیں گے۔
یاد رہے محکمہ موسمیات نے پیشگوئی کی ہے کہ رواں سال رمضان المبارک 29 روز کا ہو گا جس کے باعث 31 مارچ کو عید ہونے کا قوی امکان ہے جبکہ 30 مارچ کو شوال کا چاند نظر آئے گا ۔
