سپریم کورٹ میں نئی اصلاحات متعارف کرانے کےلیے ترمیمی مسودہ تیار کرلیا گیا۔
اعلامیے کے مطابق سپریم کورٹ رولز 1980 کے جائزے کےلیے 4 رکنی کمیٹی تشکیل دی گئی تھی، کمیٹی نے سپریم کورٹ رولز 1980 میں ترمیم کا مسودہ تیار کرلیا۔ مسودہ چیف جسٹس اور سپریم کورٹ کے ججز کو مزید غور و خوض کے لیے پیش کیا گیا۔
رولز میں ترمیم کیلئے بنائے گئی کمیٹی کی سربراہی جسٹس شاہد وحید کر رہے تھے۔ کمیٹی میں جسٹس عرفان سعادت، جسٹس نعیم افغان اور جسٹس عقیل عباسی شامل تھے۔
سپریم کورٹ کے رولز میں ڈیجیٹلائزیشن اور خودکار نظام متعارف کرانے کی سفارش کی گئی ہے جبکہ عدالتی امور میں بہتری کے لیے بار کونسلز اور ججز سے تجاویز طلب کی گئیں۔
اعلامیے کے مطابق سپریم کورٹ میں مقدمات کے انتظام کو ڈیجیٹل پلیٹ فارمز کے ذریعے بہتر بنایا جائے گا، عدالتی کارروائیوں میں غیرضروری تاخیر ختم کرنے کیلئے خودکار نظام متعارف کرانے کی تجویز بھی دی گئی ہے۔
مسودے کی منظوری کے بعد سپریم کورٹ رولز 2025 کو حتمی شکل دی جائے گی، انصاف کی فراہمی کے لیے سپریم کورٹ میں نئی اصلاحات متعارف کروائی جائیں گی۔
