وزیراعظم شہباز شریف نے جلیبی فروخت کرنیوالے فٹبال محمد ریاض کو 25 لاکھ روپے کا چیک دے دیدیا۔ فٹبالر کی ویڈیو وائرل ہونے پر وزیراعظم نے محمد ریاض کو ملاقات کیلئے بلایا تھا۔
قومی ٹیم کے فٹبالر محمد ریاض کی ایک ویڈیو وائرل ہوئی تھی جس میں وہ جلیبیاں فروخت کررہے تھے، ویڈیو منظر عام پر آنے کے بعد وزیراعظم شہباز شریف نے ہنگو سے تعلق رکھنے والے فٹبال کو ملاقات کیلئے وزیراعظم ہاؤس بلالیا تھا۔
وزیراعظم سے قومی فٹبالر محمد ریاض کی ملاقات ہوگئی، شہباز شریف نے محمد ریاض کو 25 لاکھ روپے کا چیک دیا اور ساتھ ہی نوکری دینے کا بھی اعلان کردیا۔
قومی فٹبال ٹیم کے کھلاڑی محمد ریاض مالی مشکلات کے باعث جلیبی بیچنے پر مجبور ہوگئے تھے۔
محمد ریاض ایشین گیمز، سیف گیمز، یوتھ چیمپئنز شپ میں پاکستان کی نمائندگی کرچکے ہیں، انہوں نے قومی ٹیم کی نمائنگی کرتے ہوئے درجنوں انٹرنیشنل میچز کھیلے ہیں۔
محمد ریاض ڈپارٹمنٹس کی بندش اور فٹبال فیڈریشن کی جانب سے فنڈز کی عدم ادائیگی کے باعث مالی مشکلات کا شکار ہیں، محمد ریاض کے الیکٹرک کی ٹیم سے فٹبال کھیلا کرتے تھے۔
