بھارت کے اسٹار بیٹر ویرات کوہلی نیوزی لینڈ کیخلاف آئی سی سی چیمپئنز ٹرافی کے فائنل سے قبل انجری کا شکار ہوگئے۔
آئی سی سی چیمپئنز ٹرافی کا فائنل اتوار کو بھارت اور نیوزی لینڈ کے درمیان دبئی میں کھیلا جائے گا۔
بھارتی اسٹار بیٹر ویرات کوہلی فائنل سے قبل جمعہ کو انٹرنیشنل کرکٹ کونسل اکیڈمی میں نیٹ پریکٹس کے دوران معمولی زخمی ہوگئے۔
رپورٹ کے مطابق کوہلی نیٹس میں فاسٹ بولنگ کا سامنا کررہے تھے اس دوران ایک تیز گیند ان کے گھٹنے پر جالگی، جس کے بعد انہوں نے فوری طور پر پریکٹس روک دی۔
رپورٹ میں بتایا گیا ہے کہ بھارتی ٹیم کے فزیو اسٹاف نے فوراً کوہلی کا معائنہ کیا، انہیں اسپرے لگایا اور متاثرہ جگہ پر بینڈیج باندھ دی۔
میڈیا رپورٹس کے مطابق چوٹ لگنے کے باوجود ویرات کوہلی گراؤنڈ میں موجود رہے اور بقیہ ٹریننگ سیشن کو دیکھتے رہے تاہم خود پریکٹس میں حصہ نہیں لیا۔
بھارتی کوچنگ اسٹاف نے واضح کیا ہے کہ ویرات کوہلی کی چوٹ سنگین نہیں ہے اور وہ اتوار کو فائنل میچ کھیلنے کیلئے مکمل طور پر فٹ ہوںگے۔
