فیڈرل انویسٹی گیشن ایجنسی (ایف آئی اے) لاہور زون نے انسانی اسمگلنگ کے خلاف بڑی کارروائی کرتے ہوئے ریڈ بک کے مطلوب ملزم راحیل پرویز سمیت چار افراد کو گرفتار کر لیا۔
ترجمان ایف آئی اے کے مطابق، ملزم راحیل پرویز ریڈ بک کا انتہائی مطلوب انسانی سمگلر ہے، جو 2019 سے ایف آئی اے لاہور کو مطلوب تھا جبکہ دیگر ملزمان میں محمد عمر، امام ندیم اور روحان محمود شامل ہیں۔
ملزمان شہریوں سے ویزا فراڈ اور غیر قانونی سرگرمیوں میں ملوث تھے اور انہیں ماڈل ٹاون، رحمان گارڈن اور شمع لاہور سے گرفتار کیا گیا۔
راحیل پرویز نے شہریوں کو کینیڈا بھجوانے کے جھوٹے وعدوں پر 90 لاکھ روپے ہتھیائے جبکہ دیگر ملزمان بغیر اجازت غیر قانونی ٹریول ایجنسیاں چلا رہے تھے اور شہریوں سے پاسپورٹ وصول کرتے تھے۔
چھاپوں کے دوران ملزمان کے قبضے سے 12 پاکستانی پاسپورٹس، تعلیمی دستاویزات اور موبائل سمز برآمد ہوئیں جن کے بارے میں ملزمان حکام کو مطمئن نہ کر سکے۔
ترجمان نے بتایا کہ ملزمان کو حراست میں لے کر تفتیش کا آغاز کر دیا گیا ہے تاکہ ان کے جرائم کی مزید تفصیلات سامنے لائی جا سکیں۔
