پاکستان آرمی نے 41 ویں نیشنل ایلیٹ مینز اور 5 ویں نیشنل ایلیٹ ویمن باکسنگ چیمپین شپ اپنے نام کرلی۔
قومی ایلیٹ مین اور نیشنل ایلیٹ ویمن باکسنگ چیمپئن شپ کے مقابلے 10 فروری سے 15 فروری تک کراچی میں جاری رہے۔ نیشنل باکسنگ چیمپیئن شپ مقابلے کے پی ٹی اسپورٹس کمپلیکس میں منعقد کئے گئے۔
مرد و خواتین باکسرز نے مختلف ویٹ کیٹیگری میں مقابلے کیئے اور کوالیفائی کرنے والے باکسرز کے مابین فائنل میچز ہوئے۔ نیشنل چیمپئنشپ پاکستان آرمی کے تعاون سے پاکستان باکسنگ فیڈریشن کے زیرِ اہتمام کروائی گئی جن میں انٹرنیشنل سٹینڈرڈ اور قوانین کو ملحوظ خاطر رکھا گیا۔
باکسنگ چیمپئن شپ میں 300 سے زائد کھلاڑی اور آفیشلز نے حصہ لیا، حصہ لینے والی ٹیموں میں پاک آرمی، نیوی، پی اے ایف، واپڈا، ریلوے، کے پی ٹی، بلوچستان، خیبرپختونخوا، پنجاب، سندھ، اسلام آباد، آزاد جموں و کشمیر، ایچ ای سی اور پاک پولیس کی ٹیمیں شامل تھیں۔
مجموعی طور پر پاک آرمی نے پہلی پوزیشن لیکر چیمپیئن شپ اپنے نام کی، میل کیٹیگری میں پاک آرمی کی باکسنگ ٹیم پہلے نمبر رہی اور پاکستان نیوی رنرر اپ جبکہ تیسری پوزیشن واپڈا نے حاصل کی۔
فیمیل کیٹیگری میں پاک آرمی کی باکسنگ ٹیم نے پہلی پوزیشن حاصل کی جبکہ پنجاب اور واپڈا کی ٹیمیں بالترتیب دوسرے اور تیسرے نمبر پر رہیں۔
کور کمانڈر کراچی نے فائنل میچز کی پروقار تقریب میں بطور مہمان خصوصی شرکت کی، کور کمانڈر کراچی لیفٹیننٹ جنرل محمد اویس دستگیر نے فتح یاب ہونے والے باکسرز میں انعامات تقسیم کیے اور انکی حوصلہ افزائی کی۔ کور کمانڈر کراچی کا کہنا تھا کہ یہ ایک کامیاب ایونٹ تھا جسکی بدولت پاکستانی باکسرز کو اپنا ٹیلنٹ دکھانے اور نکھارنے کا موقع ملا۔
