مسلم لیگ (ن) کے سینئر رہنما طلال چوہدری نے کہاہے کہ پی ٹی آئی وکلاءکو انصاف سے نہیں صرف پیسے سے دلچسپی ہے، پی ٹی آئی کے وکلاءنے ثابت کر دیا کہ ان کی وفاداری پارٹی کارکنوں کے بجائے صرف مالی مفادات سے جڑی ہے۔
تفصیلات کے مطابق طلال چوہدری کا کہناتھا کہ 69 مخلص کارکنوں کو قانونی ٹیم نے اس لئے چھوڑ دیا کیونکہ انہیں بھاری فیس نہیں دی گئیں، مختلف مقدمات میں ملوث کارکنوں کو بے یار و مددگار چھوڑ دینا یہ ثابت کرتا ہے کہ پی ٹی آئی کا قانونی ونگ اور ILF ان لوگوں کا ساتھ دینے کو تیار نہیں، پی ٹی آئی کارکن آج قانونی مدد سے محروم کر دیئے گئے، پی ٹی آئی قیادت خود سہولیات سے لطف اندوز ہو رہی ہے جبکہ اس کے کارکن مشکلات کا شکار ہے، یہ پی ٹی آئی قیادت کا دوہرا معیار ہے۔
انہوں نے کہا کہ آئی ایل ایف کی جانب سے اپنے ہی کارکنوں کا دفاع نہ کرنا پی ٹی آئی کی اندرونی کرپشن اور منافقت کو بے نقاب کرتا ہے، انصاف اب صرف ان کے لیے ہے جو اس کی قیمت ادا کر سکتے ہیں، یہ ہے پی ٹی آئی کا انصاف کا نعرہ ہے، آئی ایل ایف کارکنوں کے قانونی دفاع کے لئے بنایا گیا تھا، آج خود ہی کارکنوں کا ساتھ چھوڑ چکا ہے۔
طلال چوہدری نے کہا کہ پی ٹی آئی کے وکلاءاپنے موکلوں کو کارکن نہیں بلکہ پیسہ کمانے کا ذریعہ سمجھتے ہیں ، پارٹی کے لیے قربانیاں دینے والے کارکن آج اسی پارٹی کی بے حسی کا شکار ہو رہے ہیں ، پی ٹی آئی کا انصاف کا نعرہ اس وقت کھوکھلا ثابت ہو جاتا ہے جب اس کے اپنے کارکن عدالتوں میں بے سہارا ہوتے ہیں، جب پیسہ بولتا ہے تو پی ٹی آئی کے وکلاءسنتے ہیں، وفاداری اور اصول ان کے لئے ثانوی حیثیت رکھتے ہیں، اگر پی ٹی آئی آج اپنے کارکنوں کے ساتھ نہیں کھڑی، تو کل یہ عوام کے ساتھ کیسے کھڑی ہوگی؟
