اینٹی کرپشن عدالت لاہور نے وزیر اعظم شہباز شریف اور سابق وزیر اعلیٰ پنجاب حمزہ شہباز کی رمضان شوگر ملز کرپشن کیس میں بریت کا تفصیلی فیصلہ جاری کردیا ۔
جج اینٹی کرپشن عدالت محمد اقبال ڈوگر کی جانب سے جاری کردہ 12 صفحات پر مشتمل فیصلے کے مطابق کیس میں شہباز شریف اورحمزہ شہباز کو سزا کا امکان نہیں ہے اس لیے دونوں کی بریت کی درخواستیں منظور کی جاتی ہیں۔
فیصلے کے مطابق مدعی مقدمہ کے مطابق اس نے نیب کو کوئی درخواست نہیں دی اور دیگر گواہوں کو ثبوت کی عدم دستیابی کے باوجود سننا بے سود ہوگا۔
فیصلے میں کہا گیا کہ نالے کی تعمیر کیلئے تمام قانونی ضابطے پورے کئے گئے تھے اور اینٹی کرپشن نالے کی تعمیر میں بے ضابطگی ثابت کرنے میں ناکام رہی، نالے کی تعمیر کا ڈائریکٹو اس وقت کے ایم پی اے کی درخواست پر جاری کیا گیا۔
شہباز شریف کبھی رمضان شوگر ملز کے ڈائریکٹرنہیں رہے، نالے کی تعمیر کے وقت حمزہ شہباز مل کے سی ای او نہیں تھے، کسی گواہ نے شہبازشریف اور حمزہ شہباز کیخلاف گواہی بھی نہیں دی۔
فیصلے میں مزید کہا گیا کہ شہباز شریف اور حمزہ شہباز کو رمضان شوگر ملز کرپشن کیس سے بری کیا جاتا ہے۔
