پاکستان تحریک انصاف (پی ٹی آئی) نے سیاسی کمیٹی کی تشکیل نو کردی۔
پی ٹی آئی کور کمیٹی اور سیاسی کمیٹی کے اجلاس میں ارکان نے ویڈیو لنک پر شرکت کی۔ عالیہ حمزہ اور کنول شوذب کو سیاسی کمیٹی میں شامل کرلیا گیا۔
چیئرمین تحریک انصاف بیرسٹر گوہر نے شرکا کو حکومت سے مذاکرات ختم ہونے کے بارے میں آگاہ کیا۔ الیکشن کمیشن میں تقرریوں پر بھی بریفنگ دی۔ کہا حکومت الیکشن کمیشن میں تقرریوں کے معاملے پر تاخیر کر رہی ہے۔ آئین کے مطابق پینتالیس روز میں الیکشن کمیشن کی تقرریاں لازمی ہیں۔
بیرسٹر گوہر نے کہا کہ ہمارا چیف الیکشن کمشنر پر اعتماد نہیں، ہم جلد پارلیمانی کمیٹی کے نام سامنے لے آئیں گے۔ ہمارے ارکان کا نوٹیفکیشن کرنے پر ہمیں مخصوص نشستیں ملنی چاہیں۔
دوران اجلاس عالیہ حمزہ اور کنول شوذب کو پی ٹی آئی کی سیاسی کمیٹی میں شامل کرلیا گیا۔ کور کمیٹی اور سیاسی کمیٹی کو معاشی صورتحال پر بھی بریفنگ دی گئی ۔
پی ٹی آئی معاشی ٹیم نے حکومتی اعداد و شمار جھوٹ قرار دیئے۔ کہا مہنگائی اور ناقص معاشی پالیسیوں سے مڈل کلاس پس چکی۔ بیروزگاری، غربت انتہا پر پہنچ چکی ہے۔ کور کمیٹی نے پارٹی رہنماؤں کو معیشت سے متعلق حقائق میڈیا میں لانے کی ہدایت بھی کر دی۔
