وزیراعظم شہباز شریف جمعیت علماء اسلام ( جے یو آئی) سربراہ مولانا فضل الرحمان سے ملنے ان کی رہائش گاہ پہنچے جہاں ملاقات میں ملک کی سیاسی صورتحال اور پارلیمانی امور پر تبادلہ خیال کیاگیا ۔

اسلام آباد میں وزیراعظم میاں محمد شہباز شریف اور سربراہ جمعیت علماء اسلام( جے یو آئی) کی ملاقات میں مولانا عبدالغفور حیدری، مولانا عطاءالرحمان، مولانا اسعد محمود اور اسلم غوری موجود تھے جبکہ حکومتی وفد میں وفاقی وزیر اطلاعات عطاء اللہ تارڑ اور وفاقی وزیر برائے منصوبہ بندی احسن اقبال تھے۔وزیراعظم مولانا فضل الرحمان سے مختصر ملاقات کے بعد واپس روانہ ہوگئے ۔

ذرائع کی جانب سے دی گئی معلومات کے مطابق وزیراعظم میاں محمد شہباز شریف سے سربراہ جمعیت علماء اسلام ( جے یو آئی) مولانا فضل الرحمان کی ملکی سیاسی وسیکیورٹی صورتحال اورمدارس رجسٹریشن معاملے پربات چیت ہوئی  مولانا نے بلوچستان اور خیبر پختونخوا کے سیکیورٹی حالات پر تحفظات کا اظہار  کیا۔

اس موقع پر وزیراعظم شہباز شریف سے مولانا فضل الرحمان نے کہا کہ بلوچستان میں حالات ایسے ہیں کوئی بھی محفوظ نہیں، خیبر پختونخوا میں بھی امن و امان کی صورتحال خراب ہے،وزیر اعظم شہباز شریف نے مولانا فضل الرحمان کا نقطہ نظر غور سے سنا ،امن و امان کے قیام کے حوالے سے وزیر اعظم نے مثبت ردعمل کا اظہار کیا۔

 جےیوآئی کےسیکرٹری جنرل عبدالغفورحیدری کی سماء سےگفتگو

جمعیت علماء اسلام ( جے یو آئی) کےسیکرٹری جنرل عبدالغفورحیدری نے سماء سے خصوصی گفتگو کرتے ہوئے کہا ہے کہ وزیراعظم سےملاقات کاپہلےسےکوئی ایجنڈا زیرغورنہیں تھا، ملاقات میں امن و امان کےحوالے سے بلوچستان زیرغور آیا ہے خیبر پختونخوا کےحوالے سے بات چیت ہوئی ہے۔

مولانا عبدالغفور حیدری کا کہنا تھا کہ مولانا فضل الرحمان نےمدارس کی رجسٹریشن بل پربات چیت کی  اور کہا کہ صوبوں میں قانون پرتوجہ دیں تاکہ وہاں سےبھی مسئلہ حل ہو، بلوچستان میں ایک واقعہ میں 20 سے زیادہ قیمتی جانیں گئی،خیبر پختونخوا اور بلوچستان کے کئی اضلاع میں حکومتی رٹ ہی نہیں ہے۔

 جمعیت علماء اسلام ( جے یو آئی) کےسیکرٹری جنرل عبدالغفورحیدری نے سماء سے خصوصی گفتگو کرتے ہوئے کہا ہے کہ مولانا فضل الرحمان نے وزیراعظم کو بتایا کہ ان پر مدارس کی رجسٹریشن کابہت دباؤ ہے،ملاقات کے دوران وزیراعظم کا ردعمل مثبت تھا۔

خیال رہے کہ دو دن قبل  اسدقیصر کی رہائشگاہ پر اپوزیشن جماعتوں کےقائدین کامشاورتی اجلاس ہوا تھا جس میں جمعیت علماء اسلام کے سربراہ مولانا فضل الرحمان،محموداچکزئی،شاہدخاقان عباسی،مصطفیٰ نوازکھوکھرشریک ہوئے تھے تحریک انصاف  کی جانب اپوزیشن لیڈرعمرایوب،شبلی فرازاورراجہ ناصرعباس اوردیگر قائدین  بھی شریک  ہوئے تھے۔