وزیر اعلیٰ پنجاب مریم نواز نے راولپنڈی رنگ روڈ منصوبہ دسمبر تک مکمل کرنے کی ڈیڈ لائن دے دی۔
وزیر اعلیٰ پنجاب مریم نواز نے راولپنڈی رنگ روڈ کا اچانک دورہ کیا جس کے دوران منصوبے کا دائرہ بڑھانے کی ہدایت کی جبکہ منصوبے کا فضائی جائزہ بھی لیا۔
وزیر اعلیٰ کو بریفنگ کے دوران بتایا گیا کہ بانٹھ، چک بیلی خان، اڈیالہ روڈ، چکری روڈ اور ٹھلیاں کے مقام پر پانچ انٹر چینج تعمیر ہوں گے جبکہ راولپنڈی رنگ روڈ پر ریلوے پل اور 5 اوورپاسز بنائے جائیں گے اور 21 سب وے ہوں گے۔
اس موقع پر وزیر اعلیٰ پنجاب کا کہنا تھا کہ 38 کلومیٹر سے زائد طویل راولپنڈی رنگ روڈ منصوبے کی تکمیل سے ٹریفک کا دیرینہ مسئلہ حل ہو جائے گا اور تکمیل سے معاشی اور کاروباری سرگرمیوں میں بھی اضافہ ہوگا۔
وزیر اعلیٰ کا کہنا تھا کہ راولپنڈی رنگ روڈ کی تکمیل سے لاکھوں شہریوں کو سفر میں آسانی ملے گی۔
مریم نواز نے کہا کہ منصوبے کی تکمیل کے لئے فنڈز کی فراہمی یقینی بنائی جائے گی۔
